Ministrlar Kabinetında sänäğät citeşterüeneñ berençe yartıyıllığı näticäläre iğlan itelde

Ministrlar Kabinetınıñ çirattağı sişämbe brifingı sänäğät citeşterüeneñ ağımdağı yılnıñ berençe yartıyıllığı näticälärenä bağışlandı. Häm biredä qunaqlar delegatsiälär aldında söyli torğan süzlär, xäbärlär bulmadı. Brifingnı iqtisad häm sänäğät ministrı urınbasarı Sergey Muxin alıp bardı. Uzğan yartıyıllıq Tatarstan sänäğäte öçen 1998 yıldan birle iñ awır çor bulğan. Fizik miqdär indeksı digän kürsätkeç barı tik 2001 yılnıñ 6 aylığı öçen 107% bulsa, bıyıl ul köç xäl belän 100%-qa tulğan. Yäğni, bernindi dä üseş yuq, kiresençä, uzğan yıllar belän çağıştırğanda, çigenü bara. Elektroenergetikada häm ciñel sänäğättä xällär bigräk tä awır. Anda Fizik miqdär indeksı 96% häm 93% çaması. Bu xälgä Sergey Muxin ike töp säbäpne atadı. Ul, berençese, makroiqtisadta barğan protsesslar, yäğni inflyatsiä şartlarında qayber ere şirkätlärneñ eşli belmäwläre. 2001 yıl azağında häm 2002 yıl başında zavod-fabrikalarda, şirkätlärdä skladlar satılmıy torğan tawar belän tulğan. Citeşterü tempları töşüneñ ikençe töp säbäpe - energetikanıñ fizik miqdäre kimü. Citeşterü tübänäyu xezmät xaqı tülämäwçelekkä kitergän. Xezmät xaqı tülämäw buyınça Tatarstan Başqortostannan qala Rusiädä ikençe urınğa çıqqan. Şuşı wäzğıät buyınça düşämbe könne Ministrlar Kabinetı premyer-ministr Röstäm Miñnexanov räislegendä maxsus utırış ütkärde. Bu utırışta xezmät xaqı tüläw buyınça iñ kisken wäzğıät awıl xucalığında, dielde. Sänäğättäge xezmät xaqı burıçlarına qarağanda, awıl xucalığı xezmät xaqı burıçları ike tapqır diärlek kübräk. Ägär dä awıl xucalığında urtaça xezmät xaqı 1.5 meñ sum täşkil itkänen iskä alsaq, ğömumän, awıl keşese niçek yäşi, niçek kön kürä, digän soraw tua. Xezmät häm mäşgüllek ministrı Boris Zaxarov çığışında awıl cirendä 11 ay xezmät xaqı kürmiçä-almıyça yäşäwçelär küp, dielde. Ministrnıñ şundıy şaqqatırğıç mäğlümatlar kiterüenä Röstäm Miñnexanov kemneñ dä bulsa, qaysı da bulsa citäkçeneñ xezmät xaqı tülämi torğan öçen mäxkämägä birelgäne barmı, digän soraw quydı. Älbättä, yuq. Xäyer, äle küptän tügel genä “Комсомольская правда” gazetası sensatsiä itep, Mäskäw ölkäsendäge ber awıl xucalığı citäkçeseneñ xezmät xaqı tülämägäne öçen Rusiä tarixında berençe märtäbä mäxkämägä tartıluın iğlan itkän ide.