“Liberal' Rusiä“ firqäsen Rusiä Yustitsiä ministrlığı tarafınnan terkämäwgä kommentariy

Pänceşämbe könneñ räsmi xäbärläre arasında säyäsi eçtäleklese, ul da bulsa, “Liberal' Rusiä“ firqäsen terkäwne Rusiä Yustitsiä ministrlığı kire qağuına kommentariy. Eş şunda ki, waqıtında bu firqäneñ Tatarstan bülege dä oyışqan ide. Anı milli xäräkät aktivistı Mars Şämsetdinov citäkli. Rusiä yustitsiä ministrlığınıñ terkämäw öçen “Liberal' Rusiä”neñ ustavındağı qayber citeşsezleklärne sıltaw itkän. Mars Şämsetdinov bu pretenziälärne känäğätländerergä, firqä ustavına üzgäreşlär kertergä kiräk dip sanıy. Ä “Liberal' Rusiä”neñ Mäskäwdä utırğan citäkçeläre Yuşenkov, Poxmelkin yustitsiä ministrlığı qararın mäxkämädä protestlarğa kiräk dip sanıylar. Ğayre räsmi çığanaqlar “Liberal' Rusiä”ne terkämäw säbäpläre Ustav citeşsezleklärendä tügel, ä firqä räistäşläreneñ berse Boris Berezovskiy buluı dip sanıylar. Şuşı “elenep qalu” wäzğıäte “Liberal' Rusiä”neñ Tatarstan bülegeneñ matdi xälen nıq qaqşattı, xäzer alar ofisların da asrıy almıylar ikän. Şulay uq bu firqäneñ Tatarstan bülegenä Däwlät Şurasına häm Rusiä Däwlät Dumasına saylawlarda qatnaşu xıyalınnan da waz kiçärgä turı kilä. Rusiädä säyäsi firqälär perestroykası barğan çorda Tatarstan Respublika firqäse dä tawışın işetterde. Tatar-inform agentlığı Respublika firqäse liderı Möxämmät Sabirov küptän tügel Mäskäw ölkäsendä ütkän “Rusiä” xäräkäteneñ säyäsi şurası utırışınnan qayttı, dip xäbär itä. Respublika firqäse xäzerge waqıtta “Rusiä” xäräkätenä kerä ikän. Säyäsi şura utırışında “Rusiä” xäräkäte nigezendä Rusiäneñ sotsialistik firqäsen oyıştıru turında qarar qabul itelgän. Firqäneñ qorıltayı häm konferensiäse 10 sentäbrgä bilgelängän. 2003 yıl başınnan bu firqä saylaw aldı kampaniäsenä kereşergä niätli. Şunısı da mäğlüm, “Rusiä” xäräkäten Kommunistlar partiäsennän çitläştergännän soñ Genadiy Seleznev citäkläp, canlandırıp cibärergä totınğan ide. Tatarstan Respublika firqäse liderı Sabirov Rusiä sotsialistik firqäse oyıştıru utırışında qatnaşıp qaytqaç, bu äle soñğı süz tügel, Respublika firqäse başqa berär firqäneñ dä töbäk bülege bulırğa mömkin, bezneñ qararıbız mondıy firqälärneñ ustavlarında häm programmalarında töbäk bülekçeläreneñ möstäqillegen häm keşe xoquqları preoritetın niqadär çağıldıruı belän bäyle bulaçaq, digän. Anıñ fikerençä, näq menä şuşı mäs’älälär buyınça Rusiädä wäzğıät yaxşı tügel. Şuña bäyle Sabirov Tatarstan prezidentınıñ häm citäkçelegeneñ respublika mänfäğätlären nığraq yaqlawın teli. Ayırım alğanda, ul Rusiä prezidentı Vladimir Putinnıñ Tatarstan nefte böten Rusiäneke, digän fikeren tänqitläde, dip xäbär itä Tatar-inform agentlığı. Awızıña bal da may dip äytäse ide dä, läkin Respublika firqäse liderı säyäsi şurası utırışında qatnaşqan Rusiä xäräkäten citäkläwçe Gennadiy Seleznev küptän tügel Qazanda bulğanda, töbäklär, respublikalar möstäqillege, suverenitetı turında soraw birgändä, bu temağa bik stereotip fiker yörtüen beldergän. Anıñça, suverenitet ul Rusiädän ayırılp çığu, Rusiäne bülgäläw.