Kongressta kemnär qatnaşır?

Avgust axırında uzaçaq III Bötndönya tatar kongressı xaqında matbuğatta mäqälälär kürenä başladı. Milli liderlarnı, säyäsätçelärne, sänğätkärlärebezne, berençe çiratta, kemnärneñ delegat bulıp saylanuı qızıqsındıra kebek. Sorawlar küp. Qaydan, küpme delegat saylana, nik 80 meñ tatar yäşägän Ästerxannan Kongressta 5 keşe qatnaşa, ä 60 meñ tatar yäşägän Penza ölkäsennän nibarı ikäw genä kilä? Kongressta qatnaşaçaq yartı meñnän artıq delegatlar arasında nomenklatura wäkilläre, tatarnıñ xäläten, problemaların belmägän maqtawlı generallar kübräk bulıp, çın millätpärwärlär işek artında qalırmı? Comğa könne näşer itelgän “Восточный экспресс” gazetası änä şul sorawlarğa cawap ezli. Tağın şunısı qızıqsındıra. Soñğı arada Kongressnıñ räise üz urınınnan kitä digän imeş-mimeşlär çınbarlıqqa turı kiläme-yuqmı? “Восточный экспресс” gazetası xäbärçesenä BTİÜ räise Räşit Yagfarov baş tatar känäfienä layıqlı däğwaçılarnıñ isemnären äytkän. Räzil Wäliev, Fändäs Safiullin, Tufan Miñnullin häm Rafail Xäkimov. Küräseñ, naçar kompaniä tügel. Läkin başqa variantlar da bulırğa mömkin.