Qazandağı toraq-kommunal' xucalıqta Reforma däwam itä

Üzgäreşlär çorında yäşärgä yazmasın, digän ber aqıllı keşe. Qazandağı toraq-kommunal' xucalıqta tağın reforma. Yortlarda yäşäwçelär turında qayğırtuçı berdäm zakazçı direksiäse beterelde. Häm anıñ wazifaların toraq-kommunal' idaräläre aldı. Berniçä ay elek Qazan türäläre “Bez sezneñ xaqta qayğırtıp, bepdäm zakazçı direksiäse oyıştırabız”, dip xalıqnı ügetlägännär ide. İnde menä xäzer köymäläre qomğa terälgäç, ikençe törle cırlıy başladılar. Yänäse, yaña idarälär xalıq mänfäğäten iskä alıp tözelde. Ä yortlarda tärtip elek tä yuq ide, xäzer dä yuq. Citmäsä, ay sayın diärlek fatir bäyäläre dä öskä sikerä. Uzğan atnada kommunistlar Qazanda moña qarşı maxsus miting ta oyıştırğannar ide. Älegä yal parkı qarşında yözläp kenä keşe ciılğan ide. Läkin mitingnı oyıştıruçılar kiläçäktä protest belän çığuçılar sanı bermä-ber artır dip farazlıylar. İmeş, baqça sezonı betkäç tä, xalıq oşbu mäs'älädä canlanır. Süz dä yuq, härkemgä qağıla torğan bu problema känäğätsezlärne bik tiz berläşterergä mömkin.