Accessibility links

шимбә, 3 декабрь 2016, Казан вакыты 01:37

Sişämbe könne Tatarstan Yuğarı mäxkämäse Rusiä general' prokurorınıñ Tatarstan Däwlät Şurası eşçänlegenä şikäyäten tikşerde


Sişämbe könne Tatarstan Yuğarı mäxkämäse Rusiä general' prokurorınıñ Tatarstan Däwlät Şurası eşçänlegenä şikäyäten tikşerde

Sinoptiklar Tatarstan cirenä tağın 1-2 atnağa cäyge çellä hawası äylänep qayttı disälär dä, säyäsi wäzğıät, çınnan da, däwlät, parlament citäkçelärenä qızınıp, su qoyınıp yatırlıq waqıt tügel ikänen sizderde. Sişämbe könne Tatarstan Yuğarı mäxkämäse Rusiä general' prokurorı Aleksandr Zvyaginsevnıñ Tatarstan Däwlät Şurasınıñ mäxkämälärneñ Tatarstan statusına qağılışlı qararların ütäwdän çitläşüenä qarata şikäyäten tikşerde. Mäxkämä utırışı 10 minut çaması ğına bardı, dip xäbär itte www.intertat.ru säxifäse. Çınnan da, Tatarstan parlamentariyları qanun buyınça tieşle cäyge yalda. Şuña kürä Däwlät Şurası mäxkämägä älege şikäyätne tikşerüne sentäber azağına küçerü turında üteneç birde. Tatarstan prokurorı Qafil Ämirov üteneçtä kürsätelgän dälillärne töple dip tanıdı, läkin mäxkämä utırışın sentäber başına xätle genä küçerü belän kileşte. Şulay itep, Rusiäneñ xoquq saqlaw oyışmaları Tatarstan Konstitutsiäseneñ yaña redaksiäsendä kürsätelgän suverenitet turındağı statusına yäşäw öçen tağın 1.5 ay çaması ğına waqıt birde. Şuşı waqıt eçendä Tatarstan Rusiä Konstitutsiäsenä turı kilmägän matdälären täñgälläşterergä tieş. Zvyaginsev üzeneñ şikäyätendä Tatarstan Däwlät Şurasınıñ Rusiä Federatsiäse häm Tatarstan Yuğarı mäxkämäse qararların ütäwdän çitläşü faktın raslawnı sorıy, di. Ägär dä çitläşü faktı raslansa, respublika parlamentı Rusiä prezidentınıñ räsmi taratu protsedurası başlanuı turında kisätüen alaçaq. Şunnan 3 ay eçendä Tatarstan Däwlät Şurası mäxkämä qararların ütäwgä çaralar kürergä tieş. Ägärdä bu eşlänmäsä, Vladimir Putin Rusiä Däwlät Dumasına möräcäğät itäçäk. Üz çiratında Rusiä Däwlät Duması ike ay eçendä Tatarstan Däwlät Şurasın taratu turında qarar qabul itärgä tieş, dielä räsmi kommentariyda. Şulay itep, cäyge çellägä dä karamastan, respublika, millät östendä inde közge qara bolıtlar ciıla başladı.
XS
SM
MD
LG