Tatarstan keşeläre bayıraq yäşi başladımı?

Tatarstannıñ säwdä häm tışqı xezmättäşlek ministrlığı xäbär itkänçä, soñğı yartıyıllıqta waqlap satıp-alunıñ küläme artqan. Tatarstan keşeläre bayıraq yäşi başlağanmı ällä? Sannar şunı kürsätä — xalıqnıñ ğömumi kereme 12% artqan bulsa, bäyälärneñ üsüe 11% tiräsendä qalğan, dimäk, 1% çaması fayda da bar. Urtaça ber ğailä budjetınıñ yartısınnan artığı aşamlıqlar aluğa kitä ikän. Televizor, suıtqıç kebek zur tawarlarnıñ satıp alu küläme artuı, şulay uq, säwdägärlärneñ küñelen kütärä. Säwdä ministrlığı çinovnikları, monı banklar belän bergä alıp barıla torğan tawarlarnı kreditka birü ğämäle belän añlata. Şuşı sistema kertelgäç, televizor, suıtqıç, ker yuu maşinaları böten respublika buylap bik tiz arada satıla başlağan ikän. Ğömümän, Tatarstan çinovniklarınıñ plannarı zurdan. Säwdä häm tışqı xezmättäşlek ministrlığı iqtisad ministrlığı belän urtaq ciın uzdırıp, Rusiäneñ Bötendönya säwdä oyışmasına kerü perspektivaların tikşerergä ciına. Tatarstannıñ täqdimnäre, Mäskäwgä, Rusiäneñ iqtisadıy üseş häm säwdä ministrlığına citkereläçäk. Tatarstan çinovnikları, Rusiäne böten dönya cämäğätçelege qabul itsä, respublikağa investitsiä aqçaları da kiler dip ömetlänä.