Accessibility links

шимбә, 3 декабрь 2016, Казан вакыты 14:48

Pänceşämbe könne prezident Mintimer Şäymiev Hindstannıñ Rusiädäge ilçese Krişnan Ragxunatxnı qabul itte


Pänceşämbe könne prezident Mintimer Şäymiev Hindstannıñ Rusiädäge ilçese Krişnan Ragxunatxnı qabul itte

Pänceşämbe könne Qazan Kremlendä Mintimer Şäymiev Hindstannıñ Rusiädäge ğädättän tış häm tulı wäkälätle ilçese Krişnan Ragxunatx belän oçraştı. Monnan ike yıl çaması elek Rusiä prezidentı Vladimir Putinnıñ Hindstanğa vizitı barışında strategik partnerlıq turında deklaratsiä imzalanğannan soñ häm Hindstan premyer-ministrınıñ Rusiägä bıltırğı cawap vizitınnan soñ Rusiä-Hindstan arasında säwdä-iqtisadi bağlanışlar canlanıp kitkän häm bu xezmättäşlekneñ töbäklär tigezlegendä dä baruı mäslixät. Şul nisbättän Hindstan ilçese inde Rusiäneñ Ästerxan töbägendä bulğan ide. Tatarstan prezidentı matbuğat üzäge äzerlägän beleşmädä Tatarstannıñ säwdä partnerları arasında uzğan yıl Hindstan VII urınğa çıqtı, dielä. Tatarstan häm Hindstan eşmäkärläreneñ 1996 yılda tözelgän kileşüläre bar. Qazan belän Xaydarobad arasında da xezmättäşlek kileşüe bar. Hindstan ilçese oçraşu barışında Tatarstan prezidentınıñ Hindstanğa 1998 yılda bulğan eşlekle vizitın xörmät belän iskä aldı. Bügenge oçraşunı da üze öçen zur däräcä, zur xörmät itep bäyäläde. Şulay itep, Hindstan ilçese belän Tatarstan prezidentı oçraşuı barışında süz barı tik iqtisadi-säwdä xezmättäşlege mäs’äläläre turında ğına bardı. Jurnalistlar da nindider cäyge relaksatsiä xälendä idelär. Sorawlar waqıtında bernindi dä säyäsi temağa qağılu bulmadı. Hindstan belän Paqstannıñ suğış aldı xälendä toruları, şuşı könnärdä genä Paqstannıñ Hindstan belän säwdä alıp baru mömkinlege betüe turında iğlan itüe - barısı da iğtibardan çittä qaldı. Jurnalistlar belän oçraşunıñ azağı bötenläy qızıq mizgel belän tämamlandı. Çarağa çaqırılğan ike distägä yaqın jurnalistlarnıñ kübese xatın-qızlar bulıp çıqtı, häm oçraşular zalınnan çıqqan prezidentnı belän ilçene cäygeçä ciñelçä kiengän çibär xatın-qızlar törkeme qarşı aldı. Prezident, älbättä, monı iğtibarınnan çittä qaldırmadı. Töştän soñ Hindstannıñ Rusiädäge ilçese Tatarstan diniä nazarätendä, Rusiä İslam universitetında buldı. Şulay uq, anıñ programmasında Qazannıñ tarixi häm mädäni urınnarında buluı, muzıka sänğäte belän tanışu da bar. Yunıs Ätnäle
XS
SM
MD
LG