Accessibility links

җомга, 9 декабрь 2016, Казан вакыты 16:41

Ramazan İşkildin Qazanda, FSB törmäsendä


Ramazan İşkildin Qazanda, FSB törmäsendä

Ber ay elek Äzerbäyсan häm Dağıstan çigendäge tau suqmağında qulğa alınğan Ramazan İşkildin Bakudan Qazanğa kiterelde. Ul 2 yıl yarım elek Tatarstannıñ Quqmara rayonı häm Kirov ölkäse çigendäge Urengoy-Ujgorod gaz ütkärgeçen şartlatuda qatnaşqan. Bu gämäl xoquq saqlau organnarı tarafınnan diversiä dip tanılğan ide. Älege aksiäne 12 ir-yeget Yevropa illäreneñ Çeçnya faciğasenä iğtibarın yünältü öçen ütkärgännär. 10 keşe yıl yarım elek 12-14 yılğa irektän mährüm itelde. Şartlatunı oyıştıruçılarnıñ berse - Ayrat Ğıylmetdinov mäxkämägä birelmäde, çönki ul şizofreniä belän awırıy dip tabıldı. Dimäk, anı räşätkäle täräzä artındağı şifaxänädä däwalıylar. Oyıştıruçılarnıñ ikençese - Başqortostanda tuıp-üskän 26 yäşlek Ramazan İşkildin 3 yılğa yaqın yuqqa çığıp tordı. Ul Çeçnyadağı “Kavkaz” isemle suğışçılar äzerläw üzägendä xärbi gämällärgä öyrätelgän. Ammiak selitrasınnan häm başqa qul astındağı ğadi materiallardan şartlatqıç ta anıñ citäkçelegendä eşlängän. Matbuğat häm maxsus xezmätlär Ayrat Ğıylmetdinovnı da, başqort yegete Ramazan İşkildınnı da räsmi räweştä vaxxabçı dip atıy. Bu yegetlärneñ islam dine belän häm gäräp tele belän mawığuı, xärbi künegülär belän şögellänüe ser tügel. Şunısı iğtibarğa layıqlı kön-aralaş Tatarstannı, andağı mädräsä, mäçetlärne, vaxxabizm, terrorizmda gäyeplägän Tälğät Tacetdin qaramağındağı Başqortostannan çıqqan bu fanatiklar terror yulına basqanda qabat-qabat dini wäğäzlär ostası möfti Tälğät qaya qaradı mikän? Tatarstandağı din eşlekleläre şundıy sorau da birälär. Ramazan İşkildin oçqıçtan töşkäç tä, Rusiä federal' iminlek xezmäteneñ Tatarstan idaräsenä kiterelde. FSB xezmätkärläre aña Quqmara-Mamadış şähärlärendä yäşägän keşelär aldında gaz şartlatıp zıyan kitergäne öçen ğafu ütenergä täqdim ittelär. Ruxi yaqtan sınmağan häm üzeneñ qaraşlarınnan baş tartmağan İşkildin barı tik üze belän bergä diversiä eşlägän Quqmara yegetläre aldında ğına ğafu ütenep, televidenie kamerasına yazılğan. “Minem arqada törmägä elägüegez öçen Alla xaqı öçen ğafu itegez”, – digän. Fanatiknıñ Qazanğa kiterelüenä Tatarstan cämäğätçelege bernindi dä reaksiä kürsätmäde.
XS
SM
MD
LG