Accessibility links

Кайнар хәбәр

Yäşlär III Tatar Kongressına äzerlänä


Yäşlär III Tatar Kongressına äzerlänä

Şimbä, yäkşämbe, düşämbe könnärendä Tatarstanda Rusiä töbäkläreneñ yäşlär oyışmaları citäkçeläreneñ koordinatsion şurası cıyelıp, urtaq söyläşülär alıp bardı. Alar Çallığa barıp, “Nur” yäşlär oyışmasınıñ çaralarında qatnaştı. Düşämbe könne Tatar Kongressı binasında İndus Tahirov belän oçraşıp eş yünäleşlären, aldağı maqsatların tikşerdelär. Samarda, Boguruslanda, Yaroslavl'dä, Tübän Novgorodta, Tol'yattida, Yoşkar-Olada, Vladimirda, Mäskäüdä oyışqan tatar yäşläre üzäkläre şaqtıy aktiv xäräkät itä başlağan. Küp kenä töbäklärdä yäşlär tügel, ölkän yäştägelär dä tuğan teldä söyläşmi başlağan. Ul waqıtta bu yegetlär häm qızlar millätkä häm tatar telenä kübräk iğtibar itälär. Samarnıñ “Tuğan tel” oyışmasında yäşlär seksiäsen citäkläüçe Färxät Mäxmütov menä närsälär söyläde:

Bez Samarda tatar yäşläre belän bik küp çaralar ütkäräbez. Törle oçraşular, bäyrämnär, mäsälän, Sabantuy, Näürüz bäyrämnäre, bıyıl şulay uq Bolğarğa säyäxät oyıştırdıq. Yäşlär oyışmasında terkälgän äğzälär alay küp tügel, läkin oçraşularğa şaqtıy ğına keşelär cıyıla. Gäcitlärdä iğlannar biräbez, şunnan uqip telägän, qızıqsınğan keşe kilä.

Düşämbe kiçkä qädär tatar yäşläre qızu-qızu bäxäsläşep Kongressqa täqdimnären äzerläde. Koordinatsion Şuranıñ ustav proektın tikşerde. 5 yäki 10 meñ tatarlı ölkälärdän yäş wäkillär bu utırışqa kilsä dä, millionnan artıq tatarlar Başqortostannan yäşlär oyışması wäkile utırışta qatnaşmadı. Küräseñ, anda da Tatar Kongressına başqa şartlarda häm başqaça äzerlänälärder.

“Azatlıq” radiosı öçen Qazannan Rimzil Wäli
XS
SM
MD
LG