Accessibility links

Кайнар хәбәр

Qazanğa Ğiraq ilçese kilde


Qazanğa Ğiraq ilçese kilde

Qazan ilçelär şähärenä äylände, disäñ dä bula. Soñğı arada Tatarstan belän tanışu öçen ber-ber artlı törle illärneñ Rusiädäge ilçeläre kilep kenä tora. Äle 26 yüldä genä Qazanda Misır wäkillären qarşılağannar ide. 29 yüldä, Tatarstanğa tağın ber märtäbäle qunaq kilde. Bu yulı -- Ğiraqnıñ Rusiädäge ğädättän tış häm wäkälätle ilçese Abbas Xäläf Kunfud. Ğiraq ilçese citäklägän delegatsiä Tatarstanğa säfären Çallı şähärennän başladı. Anda ğiraqlılar KamAZ şirkäteneñ eşçänlege belän tanıştılar. Sişämbe, 30 yül könne, Qazan kremlendä Kunfud äfändene Tatarstan prezidentı Mintimer Şäymiev qabul itte. Şunısı qızıq, Abbas Xäläf Kunfud üz wazıyfaların äle ber genä ay üti ikän. Rusiägä Kunfud äfände äle yül başında ğına kilgän. Häm üzeneñ Rusiä töbäkläre belän tanışuın bezneñ respublikadan başlarğa bulğan. Monı ilçe äfände Ğiraq häm Tatarstan respublikalarınıñ tığız häm kiñ iqtisadi elemtäläre barlığı belän añlattı.

Şul uq könne Ğiraq respublikası ilçese Tatarstan Diniä näzärätendä möfti Ğosman xäzrät İsxaqi belän dä oçraştı, dip xäbär itte İntertat.ru säxifäse. Oçraşu waqıtında Kunfud äfände Ğiraqtağı xällär turında söyläde, dingä mönäsäbäten añlattı. Söyläşü waqıtında möselman mäğärif sistemasında mömkin bulğan xezmättäşlek turında da fiker alışındı. Möftigä, Ğiraqqa kilep, möselmannar tormışı belän tanışırğa, andağı dini belem birü sisteması täcribäsen öyränergä täqdim itelde. Şulay uq oçraşuda Qazanğa din uqıtuçıların kitertü häm «Saddam» universitetına şäkertlärne uqırğa çaqırtu turında da süz bardı. Oçraşunıñ näticäsen möfti Ğosman xäzrät İsxaqi: «Ruxi bergälekne tağın ber tapqır raslaw», - dip bäyäläde.
XS
SM
MD
LG