Accessibility links

чәршәмбе, 7 декабрь 2016, Казан вакыты 11:51

Tatarstan wäkilläre Başqortostan tatarları qorıltayenda qatnaşıp qayttı


Tatarstan wäkilläre Başqortostan tatarları qorıltayenda qatnaşıp qayttı

Başqortostan tatarları kongressınıñ ikençe qorıltayenda qatnaşqan delegatsiä Qazanğa urap qayttı. Bu kongressnıñ niçek ütüe, kemnärneñ saylanuı yäki saylanmawı belän qızıqsınuçılar küp, läkin tögäl mäğlümät azraq. İntertat.ru internet gazetasınıñ rus çığarılışında, Mortaza Räximov Bötendönya tatar kongressı delegatı buldı, digän xäbär quyıldı. Qayber cämäğät eşlekleläre Başqortostan tatarları kongressı syezdınıñ däwlät qulı belän oyıştırıluı, Bötendönya tatar kongressı delegatları itep milli xäräkät wäkilläre saylanmawı turında aldan äytä kildelär. Näticä bularaq, cämäğät oyışmalarınıñ tağın ber qorıltay ütkärergä cıyınuları turında mäğlumatlär “Azatlıq” radiosında da qorıltay ütkänçe ük äytelgän ide.

Anısı niçek bulır, Başqortostan qärdäşläre üzläre beläder. Ämma, 3 avgustta Ufada osta häm tögäl itep oyıştırılğan qorıltay buluın üz küzlärem belän kürdem. Administrativ resurs qullanılsa da, tieşle qararlarnı yaqlap häm ütäp toruçı tatar çinovnikları, uqıtuçıları, respublikada tatar faydasına bik zur eşlär eşlänüe turında çığışları ışandırırlıq itep yañğıradı. Xätta prezident Mortaza Räximov üzeneñ çığışında başqort yäşägän töbäklärdä, şul isäptän Tatarstanda da, başqort mäktäpläreneñ bulmawın atap kitte. Başqortostannıñ däwlät strukturaları çınnan da syezdnı professional ostalıq belän äzerlägännär. Anda qaynar millätçelärdän başqa, räsmi xaqimiätne yaqlawçı tatarlar az tügel. Bu eşkä, konstruktiv xezmättäşlekkä tatar zıyalılarına da öyränergä turı kiläçäk.

Başqortostan tatarları kongressı syezdında delegat itep federal inspektor Röstäm Xämitov saylanırğa tieş bulğan. Ämma, Büzdäk rayonı başlığı täqdime buyınça Başqortostan möstäqillegenä qarşı çığuçı bu räsmi zatnıñ syezdğa da kilmäwen iskä alıp, anı isemlektän sızıp, 32 meñ tatarlı Salawat şähäre tatar ictimaği üzäge räise Qurmanayıvnı saylap quydılar. Ğomümän, demokratiä uyınınıñ niqädär ostalıq taläp itkänen raslawçı misallar küp buldı anda. Biğaybä, kiläçäktä öyränergä, ğıbrätle ğamällärne iskä alırğa turı kiler.

Qorıltayda qatnaşqan, tarix fännäre doktorı Damir İsxakov, Başqortostan prezidentınıñ, premyer-ministrınıñ, däwlät vertikaleneñ tatar kongressı syezdı belän şöğıllänüne tatarlarğa xörmät belän qaraw, alar belän sanlaşu bilgese dip sanıy. Nurmöxämmät Xösäyenov, Älfir Saqaev, Marat Ramazanov häm tağın berniçä bilgele millätçeneñ Bötendönya tatar kongressına saylanmawı alarğa üzläreneñ eşçänlegen kiñ cämäğätçelekkä kürsätü mömkinlegen birä. Tatar mäsäläse tiräsendä kierenkelek, möğayın, tatarlarnıñ problemalarına iğtibarnı köçäyter. Ä inde alternativ cämäğätçelek qorıltayı yañadan ütkärelsä, anıñ praktik ähämiäte zur bulmas. Läkin oppozitsiä nindi yaña fikerlär, täqdimnär äytä, barmı yaña qaraşlar – monısı bik qızıq.
XS
SM
MD
LG