Accessibility links

шимбә, 3 декабрь 2016, Казан вакыты 22:41

“Yaña ğasır” tele-radio kompaniäse tapşıruların arttıra, ä “Tatarstan” tele-radio kompaniäse – kimetä


“Yaña ğasır” tele-radio kompaniäse tapşıruların arttıra, ä “Tatarstan” tele-radio kompaniäse – kimetä

Tatarstan xalqı üzgäreşlär çorında yäşi. Sentäber ayında Tatarstannıñ «Yaña ğasır» kanalı tulı qüätenä, älegä täwlegenä 12 säğät däwamında programmaların tapşıra başlıy. Yaña 2003 yılda «Yaña ğasır» telekanalı täwlek buyı eşli başlıyaçaq. Çärşämbe könne, xökümät binasında ütkän matbuğat oçraşuında süz şul xaqta bardı. Jurnalistlar aldında «Yaña ğasır» tele-radio kompaniäse häm Bötenrusiä Tele-radio kompaniäseneñ Tatarstan bülege citäkçeläre İlşat Äminev belän İrek Mortazin çığış yasadı.

Bilgele bulğança, elekke «Tatarstan» kanalı, VGTRK xoldınğına kermägän ike kompaniäneñ berse ide. İkençese -Yäqutiädä. Ütkän yılnı xolding citäkçelege, “Tatarstan” tele-radio kanalınıñ möstäqıllege belän rizalaşırğa telämiçä, anı bötenrusiä çeltärenä kertü türında aktiv söyläşülär alıp bardı. Tatarstan citäkçelege häm Rusiä xoldinğı wäkilläre arasındağı fiker alışularnıñ näticäsendä Tatarstanğa yaña kanal birelü häm respublikada eşläwçe televidenie kompaniäseneñ ğömum çeltärgä quşılu turında kileşende. Cihazlarnı, xezmätkärlärne bülü turında söyläşülär inde küptän barsa da, çınlıqta ayırımlanu gämälläre şuşı könnärdä genä başlandı. Rusiä tele-radio kompaniäseneñ Tatarstan bülege citäkçese İrek Mortazin xäbär itkänçä, cirle kompaniä televidenie, radio häm reklama yasawçı büleklärdän toraçaq. Şulay uq, Mäskäwneñ ike üz xäbärçese dä şuşı kanal cihazları belän eşliäçäk. Çığımnarnı Mäskäw yağı kütärergä tieş häm İrek Mortazin bilgeläp ütkänçä, aqça şul xätle külämdä birelğän ki, kanal xätta, yögerek yul reklamasınnan da baş tarta alğan. İrek Mortazin bolay dide:

“Televideniedä bezneñ 2,5 säğät, radioda – 3,5 säğät efir waqıtı bulaçaq. Mäskäwdäğe citäkçelek tellär üseşenä uñay qarıy häm milli respubikalarda eşläğän televidenie bülekçälärendä milli tapşırular saqlanğan”.

Matbuğat oçraşuında bergä utırğan “Tatarstan” häm “Yaña ğasır” tele-radiokompaniälär başlıqları İrek Mortazin häm İlşat Äminev alğa taba da bergä-bergä eşlärgä ciena. Berençedän, ber ük binalarda utırğan ike kompaniäneñ xezmätkärläre älegä ber ük cihazlarnı qullana. İkençedän, “Tatarstan” telekanalınıñ küp kenä jurnalistları, tapşıruları belän bergä «Yaña ğasır» şirkätenä küçkän.

“Tatarstan” telekanalında da üzğäreşlär buldı. 1 avgusttan başlap yaña yañalıqlar tapşıruları çığa başladı. Rusiä kanalınıñ «Vesti» xäbärlär programması kürsätelä başladı. İrek Mortazin äytkänçä, “Tatarstan” «Yaña ğasır» kompaniäse tuplağan tatarça xäbärlär programmasın üz kanalında kürsätäçäk. «Yaña ğasır» şirkätendä 550 xezmäktär bulsa, elekke «Tatarstan» kompaniäsendä 250 keşe eşliäçäk dip kötelä. 50 keşe tiräse eşsez qalaçaq. «Yaña ğasır» telekanalınıñ tapşıruları kübesençä tatar telendä çığaçaq, xalıq yaratıp ölgergän tatarça seriallar da kürsäteläçäk. “Yaña ğasır” tele-radio kanalı Tatarstannan çittä yäşäwçe millättäşlärebez mänfäğätlären istä totıp qorılaçaq ikän. Xätta tatarlar yäşägän töbäklärdä, xäbärçelär çeltären buldıru da qaralğan. Bu xaqta «Yaña ğasır» tele-radio şirkät citäkçese İlşat Äminev söyläde.

İlşat Äminevnıñ bu süzläre kübesençä radioğa qarıy. Radio tapşırularnıñ waqıtın arttıru, teleprogrammalarğa qarağanda, azraq çığımnar taläp itä, şuña kürä efir säğätlären 24-kä qädär arttıru tiz arada bulırğa mömkin.

Ozın dulqında taraluçı “Tatarstan” radiosınıñ efir säğätläre 3,5-nan artmayaçaq. Moña qadär anda çığıp kilgän tapşırularnıñ qayberläre efirda üz urının saqlap qalaçaq, ä programmalarnıñ küpçelege «Yaña ğasır» radiosına küçäçäk. Ul FM radiosı bula. Älege kanalnı Tatarstandağı tıñlawçılar yaxşı belä. Moña qädär ul “Bolğar FM” digän isem astında tapşıruların alıp bardı. “Bolğar FM” radiosı kilçäktä, yäşlär tapşıruları räweşendä, kiçke häm tönge säğätlärdä üz eşen däwam itterergä tieş. Tatarstannan çittä yäşäwçe millättäşlärebezğä «Yaña ğasır» tapşıruların qarıy häm tıñlıy alsın öçen, sputnik tälinkäsen alırğa kiräk.

Matbuğat oçraşuında belderelgänçä, “Tatarstan” radiosı häm «Azatlıq» radiosı arasında tözelgän kileşülär üz köçendä qalaçaq, programmabıznı “Tatarstan” radiosı dulqınnarında tapşıru 1 ğınwarğa qädär hiçşiksez däwam itäçäk.
XS
SM
MD
LG