Accessibility links

«Böek İdel yulı” konferensiäsendä qatnaşuçı tatarstanlılar Tallinndağı tatarlar belän oçraştılar


«Böek İdel yulı” konferensiäsendä qatnaşuçı tatarstanlılar Tallinndağı tatarlar belän oçraştılar

Tatarstan Däwlät Sovetı räise Färit Möxämmätşin häm Qazan şähär xaqimiäte başlığı Kamil İsxakov isä «Lyubov' Orlova» teploxodı belän 7 avgustta Tallinnğa kilgännär. Qazan matbuğatı älege säyäxätne yaqtırta, çönki köymädä şähär gazetalarınıñ redaktorları da bar ikän. “Böek İdel yulı” konferensiäsendä qatnaşuçılar öçen Tallinn şähäre buylap maxsus ekskursiä oyıştırğannar. Plenar utırıştan soñ Maardu qalasında Kamil İsxakov häm möfti Ğosman xäzrät İsxaqi ictimaği berläşmälär wäkilläre belän oçraşqannar. İkençe ber törkem Tallinndağı “İdel” mädäni oyışmasında bulğan. 8 yıl elek barlıqqa kilgän bu cämğıät 100 keşene berläşterä ikän. Çäy östäle artında “İdel”gä “Ağidel” başqort oyışması da quşıldı, Tallindağı millättäşlärebez Qazan belän elemtälärne nığıtırğa kileşkännär. Tönlä teploxod Finländiägä yul tottı.

Bu könnärdä Tatarstan xökümäte citäkçese Röstäm Minnexanov respublika buylap säyäxät itte. Çallıda uzğan zur kiñäşmädä timer yul xezmäte kürsätügä bäyle problemalar tikşerelde.

Timer yul digännän, Krasnodar ölkäsendäge su basular Qazannan Qara diñgezgä kitüçelärne dä totqarlağan. Anapa şähärennän poyezd belän qaytıp kilüçe balalar, mäsälän, Rostov-na-Donu şähärendä täülektän artıq utırğannar. Kavkazdan qaytuçı poyezdlarnı qarşılarğa dip Qazan vokzalına cıyılğan ata-analar borçılıp tön kiçerdelär. Bu xäbärne äzerlägändä, vokzal xezmätkärläre, Allağa şöker, balalar soñarıp bulsa da, isän-saw äylänep qayttılar, dip tınıçlandırdılar.
XS
SM
MD
LG