Accessibility links

Кайнар хәбәр

Tatarstan yäşläre Qara dingez buyenda niçek yal itä?


Tatarstan yäşläre Qara dingez buyenda niçek yal itä?

Qara dingez buylarına yal itärgä kitkän balalar häm yäşüsmerlärneñ xälläre äybät, dip xäbär itte räsmi çığınaqlar. Sport häm yäşlär eşläre ministrlığı, yıl sayın Qara dingez buyındağı turistik bazalarda balalar yalın oyıştıra. Bıyıl da, Anapa yağındağı yal itü üzäklärenä şaqtıy Tatarstan balaları kitkän bulğan. Krasnodarda su basıp, Soçi yulların sel qaplağannan soñ ministr Marat Bariev, Tatarstan yäşläreneñ xälen tikşerergä dip, şul yaqlarğa üze kitep bardı. Mäğlümat agentlıqları xäbär itkänçä, Anapada yal itüçe Tatarstan yaşläre isän-saw, toraqlarğa qaynar häm salqın su birelä, borçılırlıq säbäp yuq. Ä menä Rusiä televidenie kanalınıñ Tatarstan bülege kürsätkänçä, Krasnodar ölkäse vokzallarında poyızdlarnı kötep utıruçı balalar da şaqtıy bulğan, alar şuşı könnärdä öylärenä qaytıp citärgä tieş ide, ämma qaytu xäbäre älegä işetelmäde.

Azatlıq radiosınnıñ Qazan burosına ber tıñlawçıbız şaltıratıp, üz onığınıñ şulay uq Qara dingez buyena yal itärgä kitüe, anıñ anda kürgän mixnätläre turında söyläde. Mäsälän, bezneñ daimi tıñlawçıbız Razıy Säläxov bolay dide: Ul ber-niçä könnän soñ şaltırattı, böten äyberlär yözep yöri, kipterergä urın yuq, çatırlarda yoqlap bulmıy, avtobusta tön ütkäräbez, dide. Kiläse yılğa onıgıbıznı berär başqa cirgä cibärerbez inde.

Razıy Säläxov, tuğannarın, yaqınnarın Könyaqqa cibärgän başqalar kebek uq, könnären televizor yanında, yañalıqlar tapşıruların qarap ütkärä. Räsmi çığanaqlardan tormış rätlänä, yullar tözätelä, poyızdlar yöri, dip söylänsä, küñellärdä şik-şöhbä barıber yäşi, dip söyläde bezneñ tıñlawçıbız.

Su basu arqasında häläk buluçılar arasında Tatarstan keşeläre bulmasa da, balasız, yaqın tuğannarsız qalğan Krasnodar ölkäsendäge keşelärneñ qayğısın Tatarstannıñ küpmillätle xalqı isemennän Prezident Mintimer Şäymiev ta urtaqlaştı. Şul eçtälektäge telegramma 10 avgust, şimbä könne Krasnodar ölkäse gubernatorı Aleksandr Tkaçevka cibärelgän.
XS
SM
MD
LG