Accessibility links

җомга, 9 декабрь 2016, Казан вакыты 18:36

Böek İdel yulı säyäxäte tämamlandı


Böek İdel yulı säyäxäte tämamlandı

Böek İdel yulı buylap yörgän «Lubov Orlova» karabı yäkşämbe könne Şvetsiä yarı yanına kilep tuqtağan. Düşämbe könne, “Böek İdel yulı” dip isemlängän konferensiä Stokholm şähärendä başlanıp kitkän. Şunıñ belän bergä Qazannıñ 1000 yıllığına häm Peterburnıñ 300 yıllığına bağışlanğan kürgäzmälär açılğan.

Konferensiäneñ eşen Stokholm şähäre başlığı lord Karl Sidergsheld açıp cibärgän. Şuşı ciyenda şulay uq, “Böek İdel buyında vikinglarnıñ ähämiäte” kebek temalar tikşerelgän. Konferensiä tämämlanğanda “etno-mädäni üzençäleklär iqtisadıy xezmättäşlekkä kirtä bula almıy”, dip belderelğän. Konferensiädä qatnaşuçılar, Rusiäneñ tolerantlıq häm ekstremizmğa qarşı federal programmasına teläktäşlek kürsätkän. Düşämbe könne, şähärneñ istälekle urınnarın qarağannan soñ, Tatarstan wäkilläre Lubov Orlova karabına utırıp, sişämbe irtän, Qazanğa, qaytır yulğa çığaçaq.

Şuşı fänni säyäxättä qatnaşqan Däwlät Şurası räise Färit Möxämmätşin inde Qazanğa qaytıp citte häm «Tatar-inform» xäbärçesenä täesirlären söylärgä ölgerde. «Böek İdel yulınan ütü, Rusiäneñ Bötendönya säwdä oyışmasına kerüe aldınnan bik möhim gämäl bulıp tora. Şuşı säyäxät, Rusiäneñ şuşı dönya illäre belän integratsiesen arttıru yünäleşendä atlanğan berençe adım», digän bäya birde Färit Möxämmätşin. “Şäxsän üzem öçen, yul buylap tatarlar belän oçraşıp toru möhim buldı”, dip iskärkän Färit äfände.

Intertat.ru agentlığınıñ baş möxärrire şuşı säyäxättä qatnaşıp, älege ciyen, oçraşular turında mäğlümätlärne iñ berençelärdän bulıp xäbär itep tordı. Mäsälän, Stokholmğa qädär säyäxättä qatnaşuçılar Latviädä, Riğa şähärendä bulğan häm andağı millättäşlärebez belän oçraşqan. Şvetsiädäge tatarlar belän küreşü bulğanmı, yuqmı, bu xaqta mäğlümätebez yuq.
XS
SM
MD
LG