Accessibility links

шимбә, 10 декабрь 2016, Казан вакыты 17:54

III Bötendönya tatar kongressına äzerlek däwam itä


III Bötendönya tatar kongressına äzerlek däwam itä

Başqalabız tağın ber zur häm märtäbäle cıyınğa äzerlänä. 28-29 avgustta ütäçäk III Bötendönya tatar kongressı açıluğa inde waqıt bik az qaldı. Kongress turında bik küp yazılsa da, anıñ tögäl eş planı äle menä şuşı könnärdä genä bilgele buldı. Bötendönya tatarları cıyını üzeneñ eşen 28 avgustta seksiälärdäge eşçänlege belän başlap cibäräçäk. Kongress deputatları häm qunaqları barlığı 3 seksiädä eş alıp baraçaqlar. Bu seksiälärneñ temaları -- «Fän, mädäniät, mäğärif», ul Tatarstannıñ Fännär akademiäsendä uzaçaq, Qazan yärminkäsendä tatar eşmäkärlären «Eşlekle forum» cıyaçaq, ä yäşlär seksiäse «Qazan» milli-mädäni üzägendä ütäçäk. 29 avgust könne -- kongressnıñ plenar utırışı. Ul Säydäşev isemendäge zur konsertlar zalında bulır dip kötelä. Mäğlüm bulğança, bu zal 750 keşene sıydıra ala. Kongressqa kilgän 560 delegatnı sanamağanda, konsertlar zalında tağın 200läp qunaq urnaştırırğa mömkinçelek bar. Läkin, ğädättägeçä, qunaqlar sanı 200dän kübräk. Şuña kürä xäzerge waqıtta şuşı plenar utırışta qatnaşu öçen qunaqlarnıñ isemleklären tözü bara.

İnde kongress başlanırğa ike atna ğına waqıt qaluğa da qaramastan, şuşı cıyınnıñ eşen yaqtırtu öçen kiläçäk jurnalistlarnıñ isemlekläre dä äle açıqlanıp betmägän. Şunısın da äytergä kiräk, räsmi räweştä kongressqa barlığı 60-lap jurnalist qına kilergä tieş. Läkin akkreditatsiä sorap möräcäğät itüçelärneñ sanı 80-nän artıq ikän. Oyıştıruçılar süzlärenä qarağanda, qayber Rusiä töbäklärennän 4-5 jurnalist cibärergä telilär. Çit illärdän dä kilergä teläwçelär bar ikän. Mäsälän, Ukraina, Qazaxstan, Latviä, Üzbäkstannan. Şunlıqtan III Bötendönya tatar kongressı eşendä qatnaşuçı jurnalistlarnıñ isemlege äle haman açıqlanıp betmägän. Şulay uq kongressqa kilüçelärneñ sanı da oyıştıruçılar isäplägännän kübräk bulırğa mömkin. Qayber töbäklärdän räsmi saylanğan delegatlar belän ber rättän, tatar ictimaği oyışmalarınıñ alternativ räweştä ütkärelgän cıyılışlarda saylanğan delegatlar da avgust axırında Qazanğa cıyına.

İnde xäbär itkänebezçä, küptän tügel şundıy ber cıyılış Başqortostanda da bulıp ütte. Anda Qazannan Bötentatar ictimaği üzäge delegatsiäse dä qatnaştı. Şuşı delegatsiä wäkilläre Qazanğa Başqortostan respublikasınıñ ictimaği tatar oyışmaları syezdınıñ möräcäğätlären alıp qayttılar. Äytergä kiräk, alar älegä bernindi dä mäğlümät çarasında dönya kürmädelär. Bezgä kilep ireşkän şuşı qorıltaynıñ III Bötendönya tatar kongressına möräcäğätendä menä mondıy yullar da bar:

Bötendönya tatar kongressınıñ Başqarma komitetı Başqortostan respublikasında bernindi dä eşçänlek alıp barmadı, disäñ dä bula. 5 yıl eçendä Tatarstannan çittä iñ küp tatarlar yäşägän respublikada ber genä märtäbä dä Başqarma komitetnıñ utırışı, kongressnıñ citäkçelege belän oçraşular, bezneñ problemalarğa, alarnıñ çişeleşenä bağışlanğan bernindi dä çaralar ütkärelmäde. Başqortostan tatar ictimaği oyışmalarınıñ qorıltayı Kongressnıñ citäkçelegen yañadan saylap quyarğa täqdim itä. Häm kiläçäktä dä kongressnıñ Başqarma komitetı üzläreneñ ayanıç xällärenä iğtibar itmägän oçraqta, Bötendönya tatar kongressınıñ citäkçelek organın Qazannan Rusiäneñ başqa ber şähärenä küçerergä täqdim itä.

Bu täqdimnär küptän tügel Başqortostanda ütkän respublikanıñ ictimği tatar oyışmalarınıñ alternativ cıyılışında qabul itelgän Bötendönya tatar kongressına möräcäğätendä dönya kürde. Menä şundıy kierenke häm qatlaulı bara Qazanda avgust axırında ütäçäk III Bötendönya tatar kongressına äzerlek. Xäyer, kongressnıñ näticälären kötärgä inde küp qalmadı.
XS
SM
MD
LG