Accessibility links

чәршәмбе, 7 декабрь 2016, Казан вакыты 17:34

Aqtanışta Tatarstan mäğärif xezmätkärläreneñ konferensiäse uzaçaq


Aqtanışta Tatarstan mäğärif xezmätkärläreneñ konferensiäse uzaçaq

15 avgustta Aqtanışta Tatarstan mäğärif xezmätkärläreneñ respublika konferensiäse açıla. Mondıy konferensiälär yıl sayın ütä häm anda prezident Mintimer Şäymiev, xökümät wäkilläre, rayon başlıqları häm, älbättä inde, mäğärif xezmätkärläre qatnaşa. Bıyıl da şulay bulır, dip toralar. 16 avgust, comğa könne, konferensiäneñ eşendä Mintimer Şäymiev tä qatnaşırğa tieş. Ğädättägeçä anda cıyılğan mäğärif wäkilläre üzläreneñ problemaların tikşeräçäklär, yaña uqu yılına plannar tözäçäklär. Xäzerge zamanda Rusiädä mäğärif sistemasınıñ çişelmägän mäsäläläre bixisap, ä aqça citmäü alarnı tağın da kiskenläşterä.

Xäyer, Tatarstanda älege köndä mäğärif ölkäsendä başqa töbäklär belän çağıştırğanda xällär äybäträk. Respublikada äledän-äle yaña mäktäplär, balalar baqçaları açılıp tora, prezident programması nigezendä mäktäplärgä kompyuterlar alına, alar zamança cihazlana. Bügenge köndä Tatarstanda 2039 balalar baqçası, 2513 urta mäktäp, 14 balalar yortı, 24 mäktäp-internat, 9 urta pedagogik uçilişçe, respublika qaramağındağı 3 yuğarı pedagogika mäktäbe eşläp kilä. Mäğärif tarmağına respublikada yıl sayın 10 milliard sum aqça bülenä. Mäğärif turındağı qanun buyınça mäğärif sistemasına byudjetınıñ 18 protsent bülenep birelergä tieş. Tatarstanda bu san 16,7 protsentnı täşkil itä. Mäğärif xezmätkärläreneñ urtaçı eş xaqı – 2310 sum ikän. Tağın ber qızıqlı san. Tatar balalarınıñ yartısı diärlek tatar telendä belem ala.

Şuşı uñaydan Tatarstan prezidentı Mintimer Şäymiev konferensiädä qatnaşuçılarğa qotlauların citkerde. Anda, yaña ğasır aldıbızda yañadan-yaña häm könnän-kön qatlawlıraq burıçlar quya. Zamança mäğlümäti-kommunikativ texnologiälärne uqıtu-tärbiä protsesına xezmät itterä alırlıq uqıtuçılar äzerlärgä kiräk. Moña bäyle räweştä awıl mäktäbenä törle yaqlap yärdäm itärgä, internet-belemne dä kertep, törle varianttağı belem birü üzäkläre tözüne küzdä totıp, anı qamilläşterü yulların ezlärgä kiräk, dip äytelä. Möräcägätneñ axırında Mintimer Şäymiev respublika mäğärif xezmätkärlärenä sälämätlek, iminlek, rux kütärenkelege häm äşlärendä uñışlar telägän. Xäyer, bu teläklär çınğa aşsın öçen xaqimiätlär, şul isäptän prezident üze dä, şaqtıy öleş kertergä tieş.

«Azatlıq» radiosı öçen Tatarstan xäbärläre belän Qazannan Gölnaz İlgizär
XS
SM
MD
LG