Accessibility links

Кайнар хәбәр

Tatarstanda ike telekanal büleşä


Tatarstanda ike telekanal büleşä

Bu könnärdä iñ küp üzgäreşlär Tatarstan däwlät telekanalında bara disäñ, yalğışmabız. Här kiç diärlek ekranda yaña yözlär päyda bula, qaysıdır yañadan tua. Ğadi tamaşaçılarğa kürenmägän üzgäreşlär dä citärlek, dilär. Bolarnıñ kübese TNV, yäğni “Tatarstan Yaña Ğasır” telekompaniäseneñ barlıqqa kilüenä häm eşli başlawına bäyle: ber-işe xäbärlärgä qarağanda, başqa çıqqan telekanal iskeseneñ şaqtıy ğına malın da, xezmätkärlären dä alıp kitkän. “Звезда Поволжья” gazetası “mal-mölkätne bülü TNV faydasına 85:15 proporsiäsendä bulğan”, dip yaza. Yaña telekanalda xökümät öleşe 48% ikän. Häm anı arttıru niäte dä bar, dilär. 650 xezmätkärneñ 400-e däwlät telekanalınnan TNVğa küçä ikän.

Tatarstan däwlät telekanalına kergän radionıñ da qanatların yolqığannar, imeş. Radio xezmätkärläreneñ kübese bügen çemodannarda utıralar, studiälärne, cihazlarnı, fond yazmaların bülü dä üpkäsez, süzsez barmıy, älbättä.

Comğa könne irtän ike kanaldan da “Çulpan” programması bardı. Aña näq bügen 10 yıl tulğan ikän. Bäläkäy yubileynı bäyräm itü mäyetne soñğı yulğa ozatunı xäterlätte. Çönki populyar “Çulpan” bügen 16 avgustta battı da, yäğni yabıldı. Älbättä, “Çulpan”nıñ kürkäm traditsiäläre nindider başqa programmalarğa küçär. Läkin mondıy tere kileş kisü-bülü şaqtıy awırttıra torğan ğamäl.

Kiläçäktä niçek bulır – äytüe qıyın. Bügengä isä Tatarstan däwlät kanalı tatarça söyläşüen azayta, milli yözen yuğalta bara. Ä menä İlşat Äminov citäklägän yaña telekanal tulısınça tatar xalqına xezmät itä başlarmı? “Звезда Поволжья” gazetası bu xaqta bolay dip yaza. “İlşat Äminov 4 yıl eçendä üzeneñ potensialın kürsätte. Ul forması matur, läkin eçtälege yarlı ofitsioz televidenie yasar. Tik bu tatar kul'turasın tulısınça xarap itär ide”. Şulay bula kürmäsen ide. Yaña kanal andıy maqsattan çığıp tözelmägänder bit!

Soñğı arada “Восточный экспресс” gazetası da kürenmi başlaldı. Şaqtıy populyarlaşıp kilgän bu gäzitneñ çıqmıy başlawı finans mäsälälärenä bäyle, dilär. Qızğanıç, älbättä. Cıyın çüp-çarğa aqça tabıla, ä menä qızıqlı basmalar şulay tınıç qına can täslim qılalar.
XS
SM
MD
LG