Accessibility links

сишәмбе, 6 декабрь 2016, Казан вакыты 17:15

Bötendönya tatar kongressına äzerlek däwam itä…


Bötendönya tatar kongressına äzerlek däwam itä…

Sişämbe irtäsendä Bötendönya tatar kongressı utırışı bulaçaq. Annan soñ, säğät 11-dä kongressqa äzerlek häm anıñ programması turında brifing ütkärelä. Düşämbe könne isä, Tatar kongressı Başqarma komitetı binasında bulaçaq kongressnıñ 3 seksiäseneñ berse — käsäbäçelär forumın äzerläw buyınça kiñäşmä buldı. 28 avgustta Qazan yärminkäse üzägendä kongressqa saylanğan 150 delegat häm 100-gä yaqın eşquar öçençe tapqır eşlekle forumğa cıyıla. Bıyılğı forumğa tatar eşquarları belän söyläşergä premyer-ministr, avtomobil' sportı buyınça Rusiä çempionı Röstäm Miñnexanov ta kilergä süz birgän. Rusiä töbäklärendäge tatar milli-mädäni moxtariätläreneñ wäkilläre häm şaqtıy buldıqlı eşquarlar 28 avgusttağı forumnı häm, berük waqıtta, kongress seksiäsen niçek itep ütkärü turında söyläştelär. Bu kiñäşmäne İndus Tahirov häm Färit Urazaev alıp bardılar.

Xäzer şuşı kiñäşmädä qatnaşqan Fänis Ğataullinnıñ qayber fikerlären tıñlıyq. Fänis äfände Tatarstannıñ Xantı-Mansi okrugındagı wäkile, tatar milli-mädäni moxtariäteneñ räise:

5 mayda bezneñ wäkilçelekneñ eşli başlağanına 1 yıl buldı. Şuşı arada şaqtıy ğına eş eşlände. Tatarstannıñ säwdä yortı açıldı, Tatarstan häm Xatı-Mansi respublikası arasında kileşü imzalandı. Bezneñ wäkilçelek respublika xisabına yäşämi, bez anı üzebezneñ eşläp alğan aqçağa totabız. Milli-mädäni moxtariätkä dä öleş çığarabız äle şunnan.

Çistay rayonında tuıp-üskän Fänis Ğataullin Tömän belän Tatarstan arasında eşlekle küper sala. İqtisadi xezmättäşlektän tapqan aqçağa respublikanıñ wäkilçelege dä yäşi, milli eşlärgä dä aqmasa da, tamıp tora. Yışraq şulay bulsın ide.

Menä tağın ber buldıqlı yeget. Fäxretdin Kanyukaev Samarda käsep belän şöğıllänä. Tatar kongressı Başqarma komitetınıñ eşendä aktiv qatnaşa. Xäzerge yäşlärneñ ğädätençä ul Samardağı häm Tatarstandağı iñ populyar tellärne bergä quşıp söyli. Fäxretdin Kanyukaev häm başqa bik küp buldıqlı yegetlärebez yäştän ük tatar mäktäplärendä belem alsın, telägän qädär milli radio, televidenie qarap, tıñlap üssen, tuğan telebezne üzläştersen öçen xäzer tatar dönyası xäräkätkä kilde. Rusiä töbäklären Tatarstan belän yalğaw öçen iñ başlap yörüçe millättäşlärebezneñ aldında äle kirtälär bik küp. Bälki kongressta alar xaqında turıdan-turı söyläşep bulır.
XS
SM
MD
LG