Accessibility links

сишәмбе, 6 декабрь 2016, Казан вакыты 15:13

Vladimir Putin 30 avgustta Qazanğa kilä, ni öçen?


Vladimir Putin 30 avgustta Qazanğa kilä, ni öçen?

22 avgustta älege xäbärne ireştergän Rusiä televideniese Vladimir Putin Qazanğa 1000 yıllıqqa äzerlek eşe belän tanışırğa häm şähär köne uñayınnan kilä digän kommentariy yasadı. Xätta, Respublika köne dä telgä alınmadı. Ä III Bötendönya tatar kongressı yuq ta yuq inde. Ğadättägeçä, “Звезда Поволжья” gazetası yaña sanda Vladimir Putinnıñ Qazanğa kilüen üzençä bik yuğarı fantaziä belän farazladı. İmeş, Tatarstan prezidentı kiñäşçese Rafail Xäkimov, Däwlät Şurası komissiäläre citäkçeläre Marat Galiev häm Şaqir Yähudin qatnaşındağı komissiä aşığıç räweştä Rusiä Federatsiäse häm Tatarstan şartnamäsenä üzgäreşlär kertä, yaña tekst äzerli. Häm Rusiä prezidentı Tatarstanğa vizitı waqıtında şuşı şartnamä imzalanaçaq. Rafail Xäkimov belän elemtägä kerep, şundıy farazğa kommentariy birüen ütendem. Rafail äfände başta mondıy närsägä kommentariy yuq dip äytsä dä, şulay da Vladimir Putinnıñ Mintimer Şäymiev belän Qazanda oçraşuı waqıtında şartnamä xaqında söyläşülär bulaçaq, läkin şartnamägä aşığıç üzgäreşlär kertü häm aşığıç imzalaw şart tügel digän fikeren äytte.

Ä Tatarstan Däwlät Şurasında pänceşämbe könne çınnan da, daimi komissiä utırışları uzdı. Räsmi xäbärdä parlament kanikullarınnan soñ Däwlät Şurası daimi komissiäläre eşkä kereşte, 7 komissiäneñ bişese utırışılar ütkärde, dielä. Barlığı 60 mäsälä tikşerelgän häm küpçelek mäsälälär qanun proektları, 5 sentäberdä bulaçaq Däwlät Şurası sessiäsenä äzerlek eşlärenä qağıla. Şulay itep, Däwlät Şurasında da, şartnamä mäsäläsendä alay ığı-zığı yuq. Barısı da räte-çiratı belän bara.
XS
SM
MD
LG