Accessibility links

шимбә, 10 декабрь 2016, Казан вакыты 17:57

Bötendönya tatar kongressınıñ III qorıltayı tämamlandı


Bötendönya tatar kongressınıñ III qorıltayı tämamlandı

29 avgust könne Qazanda barğan III Bötendönya tatar kongressı “Yaña ğasır” televideniese, radiosı aşa häm İnternet çeltärendä turıdan-turı translyatsiälände. Mandat komissiäse xisabına qarağanda saylanğan 562 delegatnıñ 541 qatnaşqan. İñ zur delegatsiälär Başqortostan, Tatarstan häm Rusiädän. Rusiä xakimiäte wäkile bulıp Rusiäneñ milli mäsälälär ministrı Vladimir Zorin qatnaştı. İñ däräcäle delegatlar arasında Başqortostan prezidentı Mortaza Räximov, Çita ölkäse başlığı Rawil Giniätullin, Törkiäneñ Qazandağı general' konsulı İsmail Safa Yudjer, xalıq cırçıları Färidä Qudaşeva, İlham Şakirov, Älfiä Avzalova, xalıq şağırläre Şäwkät Galiev, İldar Yuzeev, Rusiäneñ Yevropa öleşe möselmannarınıñ diniä nazaräte räise möfti Rawil Ğaynetdin, Üzäk Yevropa öleşe diniä nazaräte räise möfti Tälğat Tacetdin, Tatarstan diniä nazaräte räise möfti Ğosman İsxaqi, Rusiäneñ tenis federatsiäse prezidentı Şamil' Tarpiççev, xalıqara grossmeyster Alisä Ğallyamova ataldı.

Berençe tänäfeskä qädär Kongressta töp dokladlar yasaldı. Tatarstan prezidentı Mintimer Şäymiev üzeneñ çığışında tatar xalqınıñ böten dönyada barğan globalläşü protsessında millätne saqlap qalu problemaların açtı. Anıñ fikerençä, III Bötendönya tatar kongressınıñ töp burıçı – tatar xalqınıñ berdämlegen nığıtu yulların bilgeläw. Başqortostan prezidentı Mortaza Räximov tuğan telendä çığış yasadı. Anıñ töp fikere çığışında kitergän xalıq mäqäle: “Tunnıñ yañası yaxşı, dusnıñ – iskese”, häm anıñ çığışında küptän tügel Başqortlar qorıltayında Mintimer Şäymiev çığışında kiterelgän “ağayne aq mıyıq, ber-berebezne qaqmayıq” digän äytemgä cepläw cawabı buldı.

Bötendönya tatar kongressınıñ ğamäldäge Başqarma komitetı räise İndus Tahirov çın küñelennän, bernindi yazusız-qäğäzsez çığış yasadı. Millätne saqlap qaluda ul ğailä tärbiäsen, ana telen häm däwlätçelegebezne berençe urınğa quya.

III qorıltayda delegatlar Mansur Xäsänov, Cäwdät Söläymanov häm Sarıtaw delegatı Ablyazov üzläre citäklägän gumanitar, yäşlär häm eşmäkärlär seksiälärneñ eşläre näticäläre buyınça xisap tottılar. İñ zur seksiä, älbättä, gumanitar. Anıñ eşendä 400 delegat häm 600 artıq qunaq häm üz teläge belän kilgän keşelär qatnaşqan. Älbättä, milli canlı tatar zıyalıları kisken tänqitle çığışlar yasağannar. Xalıq deputatı Tufan Miñnullin III Qorıltaynı isän qalırğa tırışu qorıltayı dip atarğa täqdim itkän. Fäwziä Bäyramova millätneñ assimilyatsiälänüe, yuqqa çığuı säbäpläre turında kisken çığış yasağan. Yazuçı Aydar Xälim Başqortostandağı wäzğıätneñ qatlawlığı, başqortlaştıru, urıslaştıru turında şulay uq kisken çığış yasağan. Yäşlär seksiäse citäkçese qorıltay prezidiumına tatar yäşläreneñ maxus rezolyutsiäsen tapşırdı. Eşmäkärlär seksiäse citäkçese Sarıtaw delegatı Ablyazov kötmägändä, säyäsi çığış yasadı. Ul Rusiäneñ säyäsi elitasın milli mäsälälärdä xataların tänqitläde. Şulay da, qorıltayda iñ köçle çığışnı yazuçı Zölfät Xäkim yasadı. Çığışınıñ azağında ul prezidiumda utırğan Rusiä ministrı Vladimir Zorinğa möräcäğätendä Rusiädä milli säyäsät bulmawın tänqitläp çıqtı.

Kongress barışında inde iñ täwge häm iñ olı büläk tapşırıldı. Törkiä delegatsiäse başlığı Atilla Kondız Mintimer Şäymievkä Ğayaz İsxaqinıñ qalämen tapşırdı.
XS
SM
MD
LG