Accessibility links

җомга, 9 декабрь 2016, Казан вакыты 10:54

Belem könendä Tatarstanda 21 yaña mäktäp açıldı


Belem könendä Tatarstanda 21 yaña mäktäp açıldı

Düşämbe irtäsendä Qazan xalıqara aeroportında III Bötendönya tatar kongressına kilgän Törkiä delegatsiäsen häm Yevropa wäkillären ozatqanda, xökümät boralaqları hawağa kütärelergä äzer tora ide. Bıyıl 2 sentäbergä turı kilgän belem bäyräme Tatarstanda, ğädättägeçä, zurlap uzdırıldı. Prezident, premyer-ministr, prezident apparatı citäkçese, Däwlät Şurası räise Mendeleev, Minzälä, Apas, Bua, Balıq Bistäse, Çiremşän, Çistay, Alekseevski rayonnarında yaña mäktäplär açu tantanalarında qatnaştı. Belem könendä Tatarstanda tağın 21 mäktäp açıldı, dip xäbär itelä. Xäzer respublikada iske xärabä xälendä 29 mäktäp qalıp bara ikän. Miñtimer Şäymiev Minzälädä yasağan çığışında aldağı ike yılda alar da tözätelep, yañartılıp quyılaçaq, dip belderde. Tatarstan mäğärif ministrı Faris Xarisov Belem köne belän qotlawında “bıyılğı uqu yılın 40551 berençe sıynıf uquçısı, barlığı 535 meñ uquçı başlap cibärde” dide. Şulay itep, bäyräm könne yañğırağan sannar sallı, küñelle. Läkin ul mäktäplär ana telendä söyläşüçe balalar belän tulıp torırmı, anısı bäyräm könendä söylänä torğan süz tügel. 1 sıynıfqa kilüçe balalar sanı yıldan-yıl kimügä bara dip farazlana. Şul uq bäyräm xisabına kergän Mendeleev rayonı Pesäy awılında 162 uquçığa isäpläp salınğan mäktäpkä 117 uquçı kilgän, şunıñ 16-sı – berençe sıynıf uquçısı.

Küptän tügel ber brifingta şuşı yaña mäktäplärneñ nigäder arta baruın, ä balalar sanı kimüen häm mäktäp tözeleşenä digän däwlät aqçalarınıñ bernindi bäygesez, tendersız taratıluı turında soraw kütärelde. Häm bu şaqtıy ğına cancal da çığarğan ide. Häm menä däwlät zakazı buyınça respublika agentlığı direktorınıñ wazifasınnan buşatıluı turında xäbär itelde. Säbäbe - näq menä mäğärif ministrlığı liniäse buyınça byudjet aqçaların bülüdä çıqqan cancal, dilär.
XS
SM
MD
LG