Accessibility links

пәнҗешәмбе, 8 декабрь 2016, Казан вакыты 21:13

Tatarstan Däwlät Şurası sessiäse ike köngä suzıldı


Tatarstan Däwlät Şurası sessiäse ike köngä suzıldı

Comğa könne Qazanda Tatarstan Däwlät Şurasınıñ XIII sessiäse üz eşen däwam itte. Kön tärtibenä kertelgän 81 mäsäläneñ iñ çetreklese Rusiä general' prokuraturası protestı bulğandır. Comğa könne parlament baytaq waqıtın änä şul dokumentnı qabul itü-itmäw turında baş wattı. İsegezgä töşerim: Tatarstan Konstitutsiäseneñ yaña redaksiäsendä saqlanıp qalğan suverenitetnı iskä alğan cömlälärne general' prokuratura Rusiä Konstitutsiäsenä täñgäl kilmi dip protest çığarğan ide. Deputatlar suverenitetınıñ tabutına soñğı qadaqnı suğarğa telämädelär. Bu mäs'älä buyınça täqdimnär şaqtıy buldı. Däwlät Şurası räise Färit Möxämmätşin general' prokuraturada bezneñ Konstitutsiäne döres uqımıylar, üzlärençä añlıylar dip belderde.

Eşli torğaç, xalıq deputatları protestnı şunduq qanägätländermäw yulın taptılar buğay. Däwlät Şurası älege mäsäläne centekläp öyränü yözennän 7 deputattan torğan komissiä tözede. Deputat Renat Xarisov Däwlät Şurası sessiäseneñ stenogrammasın Mäskäwgä general' prokurorğa cibärergä täqdim kertte. Deputatlar anı xupladılar. Bu mäs'älälärdä Rusiä prokuraturasınıñ ğayre räsmi advokatı deputat Aleksandr Ştanin protestnı qabul itmäwne waqıtnı suzu häm kiläçäktä xaqimiätkä yörülärgä kiteräçäk dip bäyäläde.

Däwlät Şurası sessiäsendä Däwlät Duması tarafınnan qabul itelgän “Xalıqlarnıñ telläre turındağı” qanunğa mönäsäbät tä belderelde. Anda başlap deputat Razil Wäliev çığış yasadı. Ä tanılğan dramaturg, deputat Tufan Miñnullin isä prokurorlar, protestlar, täñgälläşterügä yañadan äylänep qayttı.
XS
SM
MD
LG