Accessibility links

җомга, 2 декабрь 2016, Казан вакыты 21:15

BTİÜ prezidiumı Tatar Kongressı säyäsättän kitte, dip sanıy


BTİÜ prezidiumı Tatar Kongressı säyäsättän kitte, dip sanıy

Comğa könne Bötentatar ictimaği üzägendä journalistlar öçen press-konferensiä buldı. Ul III Bötendönya tatar kongressı uzu uñayınnan ide. Älege çara başlanır aldınnan journalistlarğa BTİÜ prezidiumınıñ säyäsi belderüe taratıldı. Anda mondıy cömlälär bar. “Çirattağı bu tatar qorıltayı millätneñ berläşüe häm dönyağa tanıluı cähätennän şaqtıy olı waqiğa buldı. Tatarstan xökümäte häm Bötendönya tatar kongressı qorıltayın äzerläw komitetı forumnı oyışqan töstä uzuı öçen zur tırışlıq quydılar”. Bu süzlär möräcäğättä berdänber uñay bäyälänmä. Qalğannarı BTK kongressın tänqitläwgä qorılğan.

BTİÜ prezidiumı Kongressnıñ säyäsi häm ideologik eçtälege tatar xalqınıñ häm Tatarstannıñ xäzerge säyäsi, xoquqi yaqtan möşkel xälennän çığaru yulların bilgeläw yağınnan ifrat däräcädä yomşaq äzerlängän bulıp çıqtı, dip sanıy. Belderüdä dä BTİÜneñ citäkçeläreneñ çığışlarında da, Kongress kürmi uzğan problemalar iskä alındı. Alar: Tatarstannıñ däwlät bäysezlege, xäzerge çorda milli xäräkätneñ töp yunäleşläre, Başqortostanda yäşäwçe tatarlarınıñ problemaları, plenar utırışta säyäsi firqa häm tatar milli oyışma wäkillärenä süz birelmäw häm başqalar. BTİÜneñ räis urınbasarı Yunıs Kamaletdinov “Kongress butafor räweştä uzdı, milli canlı delegatlarga qarşı törle provakatsiälär oyıştırıldı”, dip söyläde. Journalistlar “Nik andıy provakatsiälär eşlände?” dip töpçensälär dä, Yunıs äfände moña cawap birmäde.

Bötentatar ictimaği üzäge Kongressnıñ kiläçäktä näticäle eşläwenä ışanıçnı yuğaltmasa da, tatar xalqın häm Tatarstan mänfäğätlären säyäsi häm xoquqi yassılıqta yaqlawnı bötenläye belän üz östenä alırğa mäcbür, dip sanıy. Şulay itep, millätpärwärlär xıyallanğan berdämlek süzdä, käğäzdä genä qaldı. Ä tatarğa xas tarqawlıq, ber-bereñne añlamaw isä haman ğamäldä äle. Comğa könne bez iskä alğan ike waqiğa da – parlament sessiäse dä, BTİÜneñ press-konferensiäse dä uramdağı orkestr başqaruında yañğırağan marşlar astında bardı. İrek mäydanında, Qazan milli-mädäni üzäge qarşında Rusiä militsiäseneñ 200 yıllıq yubileena bağışlanğan çaralar ütte. Alar kiçen feyerverk belän tämamlandı. “Monısı inde tağın nindi bäyräm?” dip ğacäplänüçelär qolağına äytelde

Damir Ğismetdin
XS
SM
MD
LG