Zur bälä – ikmäk mul üskän

Tatarstanda tağın ber bälä, ağay-ene. Bıyıl ikmäk kükräp uñğan. İnde respublika buyınça 5 million tonna ikmäk cıyıp alınu turında räsmi xäbär çıqqaç, ğorurlıq xise belän bergä borçılu xisläre dä uyandı. Ber yaqtan qarağanda, Krasnodar yaqlarında kebek uñışqa ireşü, Norlat rayonında här gektardan 62 sentner ikmäk üsterü, ayırım basularda xättä 100 sentnerğa da citkerü – ädäm ışanmaslıq xäl. Sotsializm çorında mondıy uñışqa ireşkän öçen citäkçelärgä geroy yoldızı tağıldı, Lenin ordennarı, avtomaşinalar häm başqa büläklär birelde. Kürşe ölkälärdä bötenläy çäçmägän çaqta yäki ber gektardan 8-12-15 sentner cıyğanda, çınnan da, qaharmanlıq bula. Läkin bu ikmäkne qaya quyıp beterergä soñ? Xäzer ük bilgele - elevatorlarda nibarı 1 million tonnalıq qına urın bar. Däwlät buralarınıñ şulay keçkenälägen añlatıp bula. Kelätlärdä bıltırğı aşlıqlar tulıp yata. Yarıy äle, qayber çit töbäklärgä yäki çit illärgä furaj itep ikmäk satıla. Yarıy la, kürşe tirä-yaqta alabuta eçendä utırğan qayber ölkälärneñ aqçası yäki towarı bulsa. Şulay da, uñışnıñ küplege börteklelärneñ satu bäyäsen töşerä.