Accessibility links

пәнҗешәмбе, 8 декабрь 2016, Казан вакыты 11:01

Mintimer Şäymiev: “Möselman xatın-qızları Rusiä Konstitutsiäsendäge din ireklege turındağı mätdäne qullana ala…”


Mintimer Şäymiev: “Möselman xatın-qızları Rusiä Konstitutsiäsendäge din ireklege turındağı mätdäne qullana ala…”

Bıltırğı 11 sentäber Tatarstan xalqın teträndergän, qayğığa salğan, tınıçlıqnıñ qäderen iskä töşergän kön ide. Bıyılğısı xätergä alay uq uyılıp qalmas axrısı. Amerikada ber yıl elek bulğan xällär turında mäğlümat çaraları gel iskä töşerep torsa da, ğadi xalıq tormışına bu waqiğa turıdan turı tä'sir itmäde.

Xäyer, Rusiädä “min säyäsät belän qızıqsınmıym” digännärgä, “säyäsät sineñ belän qızıqsına” dilär. Şul ğıybärädän çığıp, möselman xatın-qızlarğa pasport fotosına töşergä röxsät itmäwne telgä alıp bula. Tatarstan Prezidentı Mintimer Şäymiev, sişämbe könne kiç, çit il jurnalistları belän bulğan oçraşuda, bu xaqta belderü yasadı.

«Rusiä Konstitutsiäsenä kertelgän din ireklege turındağı mätdäne möselman xatın-qızları qullana ala. Fotoğa töşü xoquqın ğadi genä inqär itü, soñğı cawap bula almıy. Bu mäs'älä xäl itelergä tieş, çönki bez xatın-qızlarnı yawlıqnı salırğa mäcbür itä almıybız. Pasport fotosına yawlıq kiep nigä töşergä yaramağanlığın centekläp añlatırğa, yäki monı röxsät itärgä kiräk» - digän Tatarstan Prezidentı. Angliäneñ SKY news telekompaniäse wäkile “bu 11 sentäberdän soñ kilep tuğan islamnan qurqu gälämäte tügelme?» digän soraw birgän. Şäymievnıñ cawabı mondıy: «Terrorçılıqnıñ milläte dä, dine dä yuq. Bersüzsez, terror xökem itelep, cazağa tartılırğa tieş, ämma monıñ arqasında böten möselmannar qıyın xälgä quyılmasqa tieş».
XS
SM
MD
LG