Qazanda Ayıqlar köne ütte

Şunısı qızıq, älege tantanalar näq menä Qazanda ütkärelgän Ayıqlıq bäyrämenä turı kilde. Qazannıñ Ayıqlar cämğıätenä dä avgust ayında 110 yıl tulğan bulğan. Elek anıñ Qazan gubernasında 61 bülege bulğan. Ä xäzer Qazanda berdän-ber Anonim alkogoliklar klubı eşläp kilä. Döres, Qazanda törle däwlät oyışmalarında Gorbaçev zamanınnan qalğan sälamät, ayıq tormışqa agitatsiäläüçe oyışmalar bar, dilär. Ayıqlar bäyrämendä Yäşlär eşläre häm sport ministrlığı Qazannıñ Bauman uramında spirtlı eçemleklärgä qarşı ber tamaşa-aksiä ütkärde. Bauman uramında yal itüçelär eçep betermägän sıraların maxsus ber çiläkkä kilep buşattılar. Eçelmägän sıra baräbärenä alarğa loterey uynattılar. Zur prizlardan qul säğätläre kürergä bula ide. Läkin bu aksiädä qatnaşuçılarnıñ 1-2 yotım sıraların qızıq öçen genä, tamaşa öçen genä tügüläre kürenep tora ide. Xäyer, bu könne dä Bauman uramında sıra särxüşläre kimemäde. “Efir” telekompaniäse şul uq kiçne Bauman uramında närsäder eçep añğırayğan ber adämneñ qırına torğan pıçaq belän 11 keşegä cärähät yasağanın xäbär itte. Ä inde Qazan sıra qıyuçılarnıñ eşlärenä kilgändä, älbättä, büdjetqa aqçalar mul keräder. Läkin şähär üzägendä bigräk tä bäyrämnärdä Qazan üzägendä sıra şeşäse kütärep yörgän yäşlär artqannan-arta bara. Yäşlär arasında sıra propagandalau cancalları da bulğaladı inde. Soñğısı -- cäy başında mäktäplärdä çığarılış kiçälären küçerä-küçerä Sıra köne ütkärep mataşular.