Accessibility links

җомга, 9 декабрь 2016, Казан вакыты 07:02

Çiläbedä Tatarstan könnäre ütä


Çiläbedä Tatarstan könnäre ütä

Çiläbe ölkäsendä Tatarstan könnäre başlandı. Anda respublikadan Mintimer Şäymiev citäklägän märtäbäle delegatsiä qatnaşa. Comğa könne irtän Qazan qunaqların aeroportta ölkä gubernatorı Petr Sumin häm başqa räsmi zatlar qarşı aldı. Şunduq Mintimer Şäymiev jurnalistlar öçen press-konferensiä uzdırğan. Tatarstan prezidentı III Bötendönya tatar kongressı, Putinnıñ Qazanğa kilüe h.b. mäs'älälär turında söyläde. Çiläbe ölkäse belän xezmättäşlek itü turındağı kileşü ike yıl elek imzalanğan ide. İke aradağı säwdä äyläneşe küläme älege xezmättäşlekneñ uñışlı baruı turında söyli. Ul xäzer 3 milliard sumnı täşkil itä. Respublika könnärendä Çiläbedä “Tatarstan sänğate” digän maxsus kürgäzmä açıldı. Anda 70-läp şirkätneñ produksiäläre quyılğan, sänğatqärlärneñ desantı da şaqqatırğıç. Çiläbe ölkäse ul 300 meñgä yaqın millättäşlärebezneñ torğan cire, tuğan yağı da bit äle. Tatarstan könnären alar ayıruça kötep aldılar. Boları, älbättä, yaxşı. Ä menä küñelne tırnap torğanı – Çiläbe ölkäsendäge tatarlar küpläp yäşägän Qunaşaq rayonındağı radiatsiä belän ağulanğan awıllar häm andağı keşelärneñ xäle.

Bötendönya tatar kongressına şul rayonnıñ başlığı Färit äfände İmangulov ta kilgän ide. Anıñ belän qısqa ğına ğäpläşep tä alğan idek. “Mayak” ülgän şirkättä avariä bulıp, şunnan zıyan kürgän awıl-şähär keşelären federal' xökümät yazmışnıñ qoçağına taşlağan, diärgä bula. Atom energetikası ministrlığı da biçaralarğa tieşle yärdämne kürsätmi. Añlaşıla ki, bäyräm könnärendä çiläbelelär qunaqlarğa mondıy möşkel, ayanıç xällär turında söyläp tormaslar. Ä menä kiläçäktä ike töbäk tä oşbu mäsäläne federal' xaqimiät qarşına qabırğası belän quya alırlar ide.

Tağın şunısın da äytergä kiräk. Rusiä töbäkläre belän gorizontal' elemtälär urnaştıru, xezmättäşlek programmasın ğämälgä aşıru üz eçenä mäğärif häm mädäniät mäsälälären dä ala. Soñğı yıllarda, nihayät, söyläşülärdä traktorlar, polietilen, timer torbalar turında ğına tügel, respublikadan çittä yäşägän millättäşlärebezneñ ruxi ixtıacların qänäğätländerü dä iskä alına häm bu yünäleştä igelekle eşlär dä başqarıla.
XS
SM
MD
LG