Accessibility links

чәршәмбе, 7 декабрь 2016, Казан вакыты 17:26

Nurmöxämmät -- televidenie geroe


Nurmöxämmät -- televidenie geroe

Yäkşämbe kiç Tatarstan teleradiokompaniäse «Итоги недели» digän tapşıruında soñğı waqıtta iseme böten Rusiägä tanılğan Bäläbäy tatar gimnaziäse direktorı Nurmöxämmät Xösäyenov turında süjet kürsätte. Tögälräge, bu küptän tügel НТВ kanalında uzğan tapşırunı qabatlaw ide. «Намедни» digän tapşırunıñ töp geroe buluı Nurmöxämmät äfändeneñ Qazanda III Bötendönya tatar kongressınnan soñ Rusiä prezidentı Vladimir Putin aldında çığış yasawına bäyle.

Bu xaqta «Azatlıq» radiosı da, başqa mäğlümät çaraları da täfsilläp söylädelär, yazdılar. Ä inde buntar Xösäyenovnıñ «Намедни» kebek populyar tapşıruda kürenüe tağın da zurıraq rezonansqa iä buldı. Äytergä kiräk, telekanal Nurmöxämmätneñ närsä belän qänäğät bulmawın obyektiv kürsätte. Bäläbäy rayon xaqimiäte başlığı, şundağı militsiä citäkçese tınğısız direktornı yomşaq qına tänqitlädelär. Yänäse, andıy mäsäläne kinät kenä böten il, anıñ prezidentı qarşında kütärep çıqqançı, üz respublika citäkçeläre aldına quyarğa kiräk ide. Älbättä, Nurmöxämmätne tänqitläwçelär üzläre dä yaxşı añlıy: Başqortostanda bu xaqta küpme genä söylämä - reaksiä ber. Et örep tora, karavan bara. Yäğni tatar telen, tatarlarnı qısu bäräbärenä başqortlaştıru bernigä qaramastan astırtın ğına däwam itä. Häm qısqa ğına süjetta telen tıyarğa telämägän gimnaziä direktorı bu xaqta açıq itterep, dälilläp äytä aldı.

Tamaşaçığa älege konfliktnıñ närsädän kilep çığuı da yaxşı añlatıldı. Şul uq waqıtta НТВ Xösäyenovnıñ ğailä tormışın, anıñ xäläl cefeteneñ borçıluın da kürsätte. «Eştän quıp çığarsalar qaya barırsıñ?”-dip soradı ul irennän telekamera aldında. - Dönyada yaxşı keşelär dä bar,- dide moña Nurmöxämmät äfände häm östäp quydı -- Xoday mäxkämäse, yäğni bojiy sud ta bar bit äle…

Älbättä, millätne yaqlap üz süzen äytä alğan Nurmöxämmät Xösäyenovqa kiläçäktä dä ciñel bulmas. Kem äytmeşli, turı äytkän tuğanğa da yaramas. Läkin kemder şul turını äytergä dä tieş bit. Tatarstan telekanalı НТВ tapşıruın respublika tamaşaçılarına citkerep igelekle eş başqardı. Çönki küpçelek älege süjetnı НТВdan qarıy almağan ide. Menä inde berniçä ay nindider texnik säbäplär arqasında Qazanda häm respublikada bu kanalnı qaraw mömkinlege çiklängän räweştä.

Yomğaqlap şunı äytäse kilä: niçek kenä bulmasın, Nurmöxämmät äfändeneñ qıyu ğamäle Başqortostan tatarlarınıñ problemalarına Mäskäwneñ genä tügel, böten il cämäğätçelegeneñ iğtibarın yünältte. Häm inde xäzer räsmi Ufa teläsä-telämäsä dä, tatar problemasın başqaça qararğa tieş bula.
XS
SM
MD
LG