Accessibility links

Кайнар хәбәр

Tatarstan xökümäteneñ tatar dönyasına yardäme.


Tatarstan xökümäteneñ tatar dönyasına yardäme.

Xalıq sanın aluğa 13 kön qaldı. Bu waqiğa mäğlümat çaralarında, törle däräcädäge kiñäşmälärdä, däwlät oyışmalarında kön tärtibenä berençe mäs'älä bulıp mende. Bötendönya tatar kongressı binasında çärşämbe könne tatar jurnalistları belän oçraşu buldı. Kirov ölkäse, Orenbur, Mordoviä, Piterbur häm başqa ölkälärdän kilgän xäbärçelärne ber cirgä ber bik küñelle säbäp cıydı. Tatarstan xökümäte küptänge wäğdäsen iskä töşerep, respublikadan çittä çığuçı tatar gäzitläreneñ matdi xälen yaxşırtu öçen yaña kompyüterlar taratırğa buldı. Oçraşunıñ başında, Bötendönya tatar kongressınıñ Başqarma komitetı räise Rinat Zakirov älege märtäbäle forumnan soñ kilep tuğan xälgä analiz yasap, iñ aktual temalar rätenä xalıq sanın alu problemasın quydı. Jurnalistlar, üz çiratında, obyektiv mäğlümat taratu mäs’älären kütärep çıqtı. Añlaşılmawçanlıqlar, mäğlümat taratuda kilep tuğan totqarlıqlar, bastırunıñ sıyfatı - bolar barısı da tatar dönyasınnıñ informatsion tirälegen tudıruğa qomaçawlıy. Ä menä milli basmalarnıñ xäbärçeläre quätle kompyüter yärdämendä internet çeltärenä dä totaşsalar, tatar matbuğatı yaña sulış alır ide, digän fiker alındı. Bälkem alege xıyallar tormışqa aşar. ICL KPVO VS zavodında cielğan cihazlar çärşämbe könne iyälärenä tapşırıldı. Tatarstan xökümäte 35 töbäkkä yaña kompyüter büläk itep birä. Bu oçraşuğa 10 ölkä wäkile genä kilgän ide, şüña kürä cihazlarnı tapşıru ale däwam itäçäk. Orenburda çığuçı “Yaña waqıt” gäzitennän Fännür Ğaysarov: Tatarstanğa bik zur räxmät. Bezneñ kompyüter bik iske ide. Perm ölkäsendä çığuçı “Tañ” gäzitennän Rinat Urazov: Bezgä kompyüter bik kiräk ide. Bez, şulay uq, tatar jurnalistlarina da qıtlıq kiçeräbez, Qazan däwlät universitetinıñ jurnalistika bulegendä bezgä kwota birelsen ide. Yaña kompyüterlar quätle bulsa da, älegä alarnıñ eş programmaları yuq. Şuña kürä xäbärçelärgä cihazların eşkä yaraqlı xälgä kiterü öçen şaqtıy tırışırğa turı kiläçäk. Çit ölkälärdä tatar xäreflären tabu bigräk tä awır problema bulıp tora. Xäbärçelärgä «Azatlıq» radiosı çığarğan kompakt tälinkä dä taratıldı. Anı qullanuçılar zamança tatar estrada cırları belän tanışudan tış, şuşı tälinkäne kompyüterğa quyıp, tatarça xäreflärne dä taba alalar.
XS
SM
MD
LG