Accessibility links

Кайнар хәбәр

Mäskäw-Qazan mönäsäbätläre elekkeçä qatlawlı


Mäskäw-Qazan mönäsäbätläre elekkeçä qatlawlı

Tatarstan Prezidentı Mintimer Şäymiev Antaliada yalda, premier-ministr Röstäm Miñnexanov ağımdağı ekonomik mäsälälär belän şöğellänä, Däwlät Sovetı häm anıñ citäkçese Färit Möxämmätşin çirattağı plenar sessiägä äzerlänä. Suverenitet, Konstitutsiä, Mäskäw belän şartnämä nixäldä disägez, xälneñ qatlawlı ikänlege sizelä. Monı raslawçı faktlar küp.

Soñğı waqıtta qayber Mäskäw säyäsätçeläreneñ Tatarstanğa häm tatarlarğa qarşı kisken häm tupas çığışları raslıy. Etnologiä institutı direktorı Valeriy Tişkov irenmiçä üze kürmägän III tatar kongressın xuplap mäqälä yazğan häm Qazanda çığuçı Zvezda Povolj'ya ğazetına cibärgän. Yänäse, kongressqa tatarlar saylap qına çaqırılğan, bu kongress tatar xalqı isemennän söyli almıy. Tanırğa kiräk: tatarlarnı bülgäläwçe, Tatarstannıñ tatar märkäze ikänlegen tanımawçı akademik Tişkov çınnan da kongressqa çaqırılmadı. Şuña kürä ul, tatarlarnıñ Tişkov digän ädämne tänqitlägänen üz küzläre belän kürmäde. Läkin üz türälärennän bu xaqta işetkän Tişkov aqlanıp, Tatarstan häm tatar kongressı östennän donos yazğan. Başqa reaksion dairälär dä tik yatmıy.

Moña tatar cämäğätçelege şaqtıy tınıç qarıy. 30 avgustta Vladimir Putinnıñ tatarlar belän oçraşuı, anıñ Rusiä millätläreneñ xoquqın yaqlawın, tuğan teldä uqıtunıñ zarur buluı turındağı süzläre qayberäwlärgä oşamasa, bu ğäcäp tügel. Xäzergä Rusiädä imperiäçel häm şovinistik qaraş şaqtıy taralğan.
XS
SM
MD
LG