Accessibility links

шимбә, 10 декабрь 2016, Казан вакыты 13:51

“Başqortostan tatarları” yoldızlar konsertı


“Başqortostan tatarları” yoldızlar konsertı

Yäkşämbe kiçendä Kamal teatrı binasında “Başqortostan tatarları” digän konsert buldı. Bu proektnıñ ideäsen Kamal teatrı citäkçeläre uylap çığarğan, oyıştıruçı – Salawat Fätxetdinov häm anıñ dusları. Bu konsertta säyäsät, millät ürçetü yäki qarşılıqlar turında söylämädelär. Nigezdä cır häm biyülär, qızıqlı şiğır, xiqäyälär täqdim itelde. Çaqmağıştan Cäwit Şakirov häm Zölfiä Şaqirova, Çişmädän Ramil Mindiär, Täteşledän Salawat, Boraydan – Xämdünä Timerğalieva, Älfis Kıyamov häm tağın 5-6 cırçı, Salawat rayonınnan Zilä Sonğatullina häm başqalar çığış yasadı. Başqortostanda yäşäwçe cırçı İdris Karimullinnıñ tatarça konsertları Mäläwezdä häm Stärletamaqta bilgelängän bulğan, ämma alar tıyılğan. İdris Karimullin Qazanğa kilep şuşı konsertta qatnaştı. Liliä Mullağalievanıñ konsertı Oktäberskida bilgelänep, biletlar satılğan bulğan, anısı da tuqtatılğan. Başqa tatar cırçılar da aldan gastrollären kürşe respublikağa täğäyenlägän bulsalar, alarnıñ da fälän rayonnarğa kertelmäwe turında iğlan itärgä turı kiler ide. Ämma, qabatlap äytäm, berkemne dä sügü, zarlanu işetelmäde bu konsertta. Barı tik ğorurlıq, Tatarstannıñ tatarlarğa häm başqa millätlärgä yaxşı qaraşı turında äyttelär. Keşeneñ talantı häm fidaqärlege anıñ milläte häm nindi urında tuuınnan möhimräk.

“Başqortostan tatarları” digän cır soñğı waqıtta ike respublikada da populyar bulıp kitte. Bu cırnıñ tekstın Däwlät Sovetı räise urınbasarı Robert Miñnullin yazan. Ämma cırda şigerneñ barı tik ber öleşe genä qullanılğan. Bu konsertta Robert Miñnullin çığış yasadı. Ul yaqtaşları turında äytep, üz şigereneñ tulı tekstın uqıp çıqtı.

“Başqortostan tatarları” konsert programması yıl sayın qabatlansın, şul isemdäge cämğıät häm gazeta oyıştırırğa kiräk digän täqdimnär dä yañğıradı yäkşämbe kiçendäge bu sänğat bäyrämendä.

Rimzil Wäli
XS
SM
MD
LG