Accessibility links

шимбә, 10 декабрь 2016, Казан вакыты 13:46

Xalıq sanın alu näticäläre çınbarlıqqa turı kilmäsä BTİÜ alarnı tanımayaçaq


Xalıq sanın alu näticäläre çınbarlıqqa turı kilmäsä BTİÜ alarnı tanımayaçaq

Sişämbe könne Bötentatar ictimaği üzägendä ütkän matbuğat oçraşuında bu mäsälägä qağılışlı sorawlar küp buldı. BTİÜ bu mäs'älä buyınça 8 oktäberdä maxsus möräcäğät qabul itte. Anda “Rusiädä borıñğıdan birle xalıq sanın aluda imperiäçel säyäsät alıp barıluı faktları kiterelä. Bıyılğı xalıq sanın aluda da Rusiä däwlät maşinası xalıq sanın alu näticälären imperiäçel mänfäğätlärdä üze telägänçä qullanaçaq” digän faraz äytelä. “Konfidensial'” digän süz astında xalıq sanın alu sere saqlanmıy, ä bälki kübräk anıñ näticäläre, sanawnıñ xäyläläre sere saqlana, 1989 yılğı xalıq sanın isäpkä aluda tatarlar sanı 2-3 tapqır azraq kürsätelü mäğlüm. Yäğni kompetentlı ğalimnär mäğlümatlarınça, tatarlar sanı 15-20 million”, dielä älege möräcäğättä. Möräcäğättä Rusiä xaqimiäte xalıq sanın isäpkä alu anketasındağı 11 sorawğa cawapnı toraq xucalıq idarälärendäge, pasport öställärendäge, pensiä waqıflarındağı häm eçke eşlär ministrlıgındagı mäğlümatlardän mondıy qimmätle häm şaw-şulı kampaniä ütkärmiçä dä tuplıy alır ide dielä. Bu xaqimiätneñ nindider legitimlıqqa däğwa itüe genä digän fiker äytelä möräcäğättä.

İctimaği üzäk anketadağı 7. “Ваша национальная принадлежность'” digän sorawğa ğorur itep “tatar” dip cawap birergä çaqıra. Ägärdä xalıq sanın alu näticäläre falsifikatsiälänsä häm çınbarlıqqa turı kilmäsä, TİÜ üzendä xalıq sanın isäpkä alu näticälären yuridik yaqtan mäğnäsez dip sanaw xoquqın qaldıra. Bötenrusiä xalıq sanın aludağı anketadağı millät, tuğan tel turındağı sorawlarnıñ quyılışı belän rizalaşmıyça, BTİÜ, İdel-Ural ictimaği xäräkäte prezidiumnarı, Xalıq frontı ştabı, respublikanıñ Aqsaqallar şurası häm “Azatlıq” yäşlär xäräkäte idaräse urtaq möräcäğät tä yasadılar. Alar da ägärdä xalıq sanın isäpkä alu näticäläre tatarlarnı etnik törkemnärgä waqlawğa, assimilyatsiäläügä kitersä, mondıy näticälärne tanımayaçağın aldan uq kisätep quyalar.
XS
SM
MD
LG