Accessibility links

җомга, 9 декабрь 2016, Казан вакыты 05:07

Däwlät Şurasınıñ Fän, mäğärif, mädäniät häm milli mäsälälär komissiäse utırışında televidenie…


Däwlät Şurasınıñ Fän, mäğärif, mädäniät häm milli mäsälälär komissiäse utırışında televidenie…

Tatarstanda töp yañalıqlar, bigräk tä säyäsi xäbärlär, soñğı waqıtta barlıq televizion kanallardan ber tösle kürsätelä, ber tösle taswirlana. İnde ike aydan artıq Tatarstanda ike däwlät teleradiokompaniäse eşläsä dä, bu kanallarda xäbärlär berük. Bu kompaniälärneñ ber-bersennän bülenep çığuı, ber-bersennän bäysezlege, möstäqillege xäzergä şul däräcädä. “Tatarstan” häm yaña oyışqan “Yaña ğasır” teleradiokompaniäläreneñ xäle pänceşämbe könne Tatarstan Däwlät Şurasınıñ fän, mäğärif, mädäniät häm milli mäs'älär komissiäsendä tikşerelde. İke räisneñ dä “Yaña ğasır” kompaniäse räise İlşat Äminovnıñ da, Tatarstan teleradiokompaniäse räise İrek Moratzinnıñ da çığışları xisle buldı. Berençeseneke optimistik xistä - barısı da bar, barısı da bulır, qalğanın buldırırğa tırışırbız. “Yaña ğasır” tapşıruların xäzer Finlandiädän alıp Sebergä xätle, Arxangelskidan Törkiägä xätle qarıylar häm tıñlıylar ikän. “Yaña ğasır” radiosı Rusiäneñ tatarlar küpläp yäşägän töbäklärendä korrespondentların buldıra. Alar Mäskäwdä häm Yekaterinburgta buldırılğan inde.

İrek Mortazin citäklägän “Tatarstan” teleradiokompaniäse xäzer aldağı könne niçek uzdırırğa, närsä belän, kem belän eşlärgä häm kemgä, närsägä, qayan alıp tülärgä digän problemanı xäl itä. Barlıq matdi, finans, tä'min itü mäsäläläre barı tik “Yaña ğasır” teleradiokompaniäse citäkçelege arqılı ğına xäl itelä. Küptän tügel Tatarstan teleradiokompaniäse kergän Bötenrusiä däwlät teleradiokompaniäse citäkçeläre “Bez Tatarstanğa 8 säğätkä xätle tapşırırğa irek quyabız” dip beldersälär dä, Tatarstan teleradiokompaniäse avgust ayında 5.5 säğät tapşırsa, sentäberdä - 4 säğät çaması häm oktäberdä tağın da azraq tapşıraçaq. İke teleradiokompaniä arasında mal-mölkät büleşü, “yurğan tartışu”dan kemnär ota da, kemnär ottıra soñ? Deputat Tufan Miñnullin söyli:

Bez konsepsiäne qarap çıqtıq, läkin töp konsepsiä yuq bezneñ, xalıqqa bez niçek xezmät itäbez digän. Menä şundıy konsepsiä bulsa, barısı da açıqlanır ide. Tatar häm urıs telendäge tapşırular 50:50 digän konsepsiä nigä elekkege “Tatarstan” kompaniäsendä genä konsepsiä itep alınğan? Moña cawap yuq. Menä federal' televidenie başqa millätlärneñ niçä protsent buluına qaramastan tapşırularınıñ barısın da urıs telendä alıp bara. Nigä tatarça tapşırular turında süz çıqqaç qına 50:50 digän konsepsiä kilep çığa. Çönki ğomumän respublikada milli konsepsiä yuq.

Şulay itep, artıq optimistlarça awız yorıp yörüdän dä, häm pessimistlarça yılap yörüdän dä tatar xalqına älläni fayda yuq. Şul uq maqtalğan “Yaña ğasır” televideniesen respulika rayonnarında, awıllarında qarıy almıylar. Şuña kürä “Tatarstan” teleradiokompaniäsenä birelgän 7-8 säğätne respublika xäbärläre belän, respublikağa bağışlanğan tapşırular belän tutırsañ - rayon, awıl xalqına faydadan başqa närsä bulır ide ikän? Komissiä utırışında menä şundıy sorawlar quyıldı. Häm menä şulay bu kompaniälärne finanslawnı quldan ıçqındırıp, däwlät şuşı ike kompaniäneñ tartqalaşuın küzätüçegä äylänep qala digän näticälär yasaldı. Premyer-ministr urınbasarı Zilä Wälievanıñ bu ike kompaniäneñ eşçänlege buyınça mäğlümatı tıñlandı häm bu mäğlümat kiläçäktä küzdä totılaçaq. Utırıştan soñ konkret närsä üzgärä soñ? Tatarstan däwlät teleradiokompaniäseneñ bötenrusiä teleradiokompaniäse xoldinğına küçep betkänçe häm annan finanslaw başlanğançığa xätle Tatarstan büdjetınnan finanslaw tuqtatılmayaçaq. Ministrlar Kabinetınıñ 7 oktäberdä qabul itkän maxsus qararında şuşı ike kompaniä arasında büdjet aqçaların bülü strukturasına tieşle üzgäreşlär kertelgän.
XS
SM
MD
LG