Rusiädä xalıq sanın isäpkä alu tämamlandı

Çärşämbe, 16 oktäber, Rusiädä xalıq sanın isäpkä alunıñ soñğı köne. Şulay itep, küp kenä bäxäslärgä kitergän, şaqtıy ğawğa çığarğan can isäben alu tämamlandı disäñ dä bula. Xäyer, alay dip äytü äle irtäräkter. Çönki xalıq sanın alunıñ räsmi öleşe betsä dä, 16 oktäberdän soñ anıñ äle tağın da mawıqtırğıç öleşe başlanırğa mömkin. İnde xäbär itkänebezçä, Tatar ictimağıy üzäge dä şuşı çaranıñ ütüe, anıñ näticäläre belän kileşmiçä, mäxqämägä barırğa cıyına. Ä Rusiäneñ milli säyäsät buyınça ministrı Vladimir Zorin äytkänçä, qayber Rusiä töbäklärendä xalıq sanın isäpkä alunıñ döreslegen, tögällegen tikşerü niätennän xalıqnı soraştırular ütkäreläçäk. Ayırım alğanda, bu soraşular millät grafasın tutırğanda bäxäslär kilep çıqqan Başqortostan, Tatarstan häm tağın şundıy berniçä töbäktä ütkäreläçäk ikän. Şunısın da äytergä kiräk, Rusiä büdjetına 5 milliardtan artıq sumğa töşkän xalıq sanın isäpkä alunıñ tulı näticäläre 2004 yılda ğına dönya küräçäk. Xäyer, bu çarağa qarata törle däğwaları bulğan keşelär aña qädär kötep tormaslar inde.