Accessibility links

пәнҗешәмбе, 8 декабрь 2016, Казан вакыты 17:25

“Azatlıq” radiosı tıñlauçılarınıñ fikerläre


“Azatlıq” radiosı tıñlauçılarınıñ fikerläre

Bügenge xäbärlärdä sezne «Azatlıq» radiosınıñ daimi tıñlawçılarınıñ fikerläre belän dä tanıştırası kilä. Alarnıñ berse — Saniäf Gardanov. Radionıñ Qazan bürosına xatın yullap, tatarnı borçığan mäsälälär xaqında üzeneñ uy-fikerlären citkergän ul. Saniäf äfände Belorusiädä, Grodno şähärendä yäşi. «Azatlıq» radiosın inde 15 yıllap tıñlıy. Tapşırularıbızda kütärelä torğan problemalar anı da bik borçıy ikän. Mäsälän, tatar-başqort probleması xaqında Saniäf äfände Gardanov «Azatlıq»nıñ Ufadağı xäbärçeläre belän fiker alışırğa teli, läkin alarnıñ adressların belmi.

Bezneñ tıñlawçıbız, Aqtanış rayonında Sön yılğası buyında urnaşqan Axun awılında tuıp üskän. Zamanında çuqındırudan qaçıp bu tirälärgä kilep urnaşqan tatarlanıñ ber öleşe cir alır öçen başqort dip yazılğan, dip xäbär itä üzeneñ xatında Saniäf äfände. Saniäf äfände, şulay uq, radiobızda muzıkal' säxifälärneñ kübräk buluın da teli ikän. Milli moñnar Belorusiäneñ Grodno şähärendä yäşäwçe 200-läp xäzerge zaman tatarlarına häm monnan 600 yıl elek kilep urnaşqan borınğı babalarıbıznıñ warislarına tuğan yaqlarınnan säläm bulıp yañğırar ide, dip yaza tıñlawçıbız Saniäf Gardanov.

İkençe xatnıñ avtorları — Başqortostannıñ Oktäberskiy şähäre veterannarı. Alar üzläre yäşägän şähärneñ xäbärlären, anda yäşäwçe tatar-başqort häm başqa xalıqlar, ğomümän, Başqortostan turında yazalar. Menä xattan berniçä özek:

“Bez tatar-başqort ictimağıy üzägen üzgärtep qoru zamannarında oyıştırdıq. Ämmä, ike tuğandaş millätne Ufadan keşelär kilep, bez, başqortlar, üzebez ayırım oyışma bulabız, dip ayırıp kittelär. Menä xäzer bezdä tatar milli mäclese häm başqort qorıltayı oyışmaları bar. Başqortlar bezneñ şähärdä bik az bulsa da, başqort gimnaziäse eşli. Bik küp köräşep yöri torğaç, 10 yıl uzğaç Mulla awılındağı elekke tatar mäktäbenä gimnaziä dip yazu eldelär. Läkin ul bina suğış waqıtında xärbi gospital' öçen tözelgän bulğan, anda mäktäp yäki gimnaziä öçen ber şart ta yuq. Yartı xalqı tatar millätennän bulğan şähärdä ber tatar mäktäbe dä, xätta tatar sıynıfı da yuq. Bezdä 7-8 yıllar elek törek qärdäşlärebez törek litsey açarğa yörep, aça almıy kittelär. Şulay da berse, ber taşlandıq balalar baqçası binasın 2 yıl buyına törek aqçasına ayaqqa bastırıp, uzğan yıl 25-30 ir bala öçen pansionat dip atap, ber tärbiä-täwfiq yortı açqan ide. Bıyıl avgust ayında yuq-bar säbäplär tabıp, yala yağıp şähär häm respublika gäzitlärenä yalğan yazdılar. Pansionatnı yabıp, anda ğärip balalarğa närsäder yasarğa uylıylar. Ä bit şähärdä taşlandıq binalar bik küp. Şularnı rätläp açsınnar ide. Bezneñ şähärgä tärtiple, sälätle, täwfiklı balalar kiräkmider inde. Bu balalar häm alarnıñ ata-anaları, bez veterannar şuşı ğadelsezlekkä qarşı köräşep yöribez.”

Qurqu säbäple üz isemnären kürsätergä telämägän Oktäberskiy veterannarın, Başqortostanda xalıq sanın isäpkä alğanda tatarlarnı başqort itep yazu mäsäläse, tatar telendä mäğlümät ala almaw, şähärdä tatar kitapxanäse bulmawı da bik borçıy ikän. Üzläreneñ «Azatlıq» radiosına yullağan xatların alar şağir Äñgäm Atnabaevnıñ kileşmäskä qıyın bulğan yulları belän tämamlıylar:

Tatar dibez, başqort dibez,
anda meni mäsälä?
Başqortnı da, tatarnı da
urıs yota — wät bälä!


Tıñlawçılarıbıznıñ fikerläre belän tanıştırunı däwam itep alarnıñ tağın bersenä süz biräse kilä. Qazannıñ Qol Şärif mäçete xezmätkäre Zöfär äfände Ğäliulla da «Azatlıq» radiosın daimi tıñlıy ikän. Ul sezgä radio belän bäyle üzeneñ xatirälären söylär:

Min Ğiraqta uqığan çaqta, tuğan xalqımnı, ilemne sağınğaç, kön sayın «Azatlıq» radiosın tıñlıy idem. Minem belän bergä uquçı başqa şäkertlär üzläreneñ milläten zurlağan waqıtta, min alarğa tuğan telebezdä yañğırağan radiotapşırularnı tıñlata idem. Sezneñ andıy radiogız barmı, dip soraw köçle tä'sir itä ide. «Azatlıq» radiosı xaqlıqnı söyli — iñ möhime şul!

Sez Qol Şärif mäçete xezmätkäre Zöfär äfände Ğäliullanı tıñladığız. Xörmätle tıñlawçılar. Bezneñ öçen sezneñ fikerne belep toru bik möhim. Şuña kürä, täqdimnäregez, fikerläregez, tänqit süzläregez bulıp sez alarnı bezgä citkerergä telisez ikän, bezneñ adres: 420012 Qazan-12, abonement tartması 155. Telefon 368102.

Elektron xatlarnı azatliq@rferl.org adresına cibärä alasız, yä isä www.azatliq.org säxifäseneñ berençe bitendä turıdan-turı yaza alasız.

«Azatlıq» radiosı öçen Tatarstan xäbärläre belän Qazannan Gölnaz İlgizär
XS
SM
MD
LG