Accessibility links

шимбә, 3 декабрь 2016, Казан вакыты 05:32

Vladimir Putinnıñ tatarlar belän oçraşqannan soñ quşqan eşläre mäğlüm buldı


Vladimir Putinnıñ tatarlar belän oçraşqannan soñ quşqan eşläre mäğlüm buldı

30 avgustta Vladimir Putin tatarlar belän oçraşqan ide. Bu oçraşuda yañğırağan täqdimnärneñ yazmışı qatlawlı buldı. Nişläpter, Rusiä Duması häm qayber federal' çinovniklar tatarlar belän oçraşunı häm alarnıñ täläplären önäp betermäde. Kiresençä, Tatar Kongressın, Tatarstannı xurlap distälärçä mäqälälär basıldı. Televideniedä kinäyäle işärälär yasaldı. Bälki Vladimir Putinnıñ, “Rusiä - küpmillätle däwlät”, dip özderep äytüe, balalarnı milli tellärdä uqıtu kiräklegen iğlan itüwe, xalıq sanın alğanda tuğan tel turında soraw birü – xatalı ğämällärder. Kemgä ışanırğa? Putinnıñ süzlärenäme ällä başqarma xaqimiätneñ konkret ğämällärenäme?

Nihayät, bu mäsälägä açıqlıq kerä başladı. Xalıq sanın alğanda bülletendä yazılmağan soraw birep, keşelärneñ tuğan telen yazıp quyu mömkinlege tudı. Bu inde Bäläbäy gimnaziäse direktorı Nurmöxämmät Xösäinovnıñ häm Ufadan kilgän Zahir Xäkimovnıñ Vladimir Putinğa turıdan-turı äytkän täqdime Prezident tarafınnan isäpkä alınğan häm ütälä, digän süz. Kemneñ niçek ütäwe yäki äytelgänneñ mäğnäsen üzgärtü – başqa mäsälä. Nihayät, Vladimir Putinnıñ Qazandağı oçraşudan soñ quşqan eşläre mäğlüm buldı. Älege oçraşu ütep 5-6 atnadan soñ Vladimir Putin şuşı yomışlarğa imza quyğan. Ul dokument 4 mätdädän tora.

Berençese – ber yıl eçendä Rusiäneñ milli säyäsäte konsepsiäsenä üzgäreşlär kertü turındağı mäsäläne xokümät bik äybätläp qararğa tiyeş. İkençese -- mäğlümät ministrı Mixail Lesinğa, milli eşlär ministrı Vladimir Zorinğa, mädäniät ministrı Mixail Şvıdkoyğa “Kultura” televidenie kanalında Rusiä xalıqları turında daimi tapşırular alıp baru xaqında mäsäläne tikşerergä. Öçençese – Mäskäw xökümäte belän bergä, Vladislav Surkov, Vladimir Zorin, Mixail Şvıdkoy äfändelär Mäskäwdä tatar milli-mädäni üzägen tözü mäsäläsen xäl itärgä tieş. Dürtençese, ğomüm urta belem birü standartların äzerlägändä milli tellärne uqıtunı häm milli mädäniätne öyränüne küz aldında totarğa. Bu mätdägä şundıy östämä yazıp quyılğan – “dlya jelayuşçix”, yağni telägän keşe öçen. Telämäsäñ - uqımıysıñ. Teläsäñ – uqı, öyrän, telämäsäñ - yuq.
XS
SM
MD
LG