Accessibility links

сишәмбе, 6 декабрь 2016, Казан вакыты 08:52

… Prezident kiñäşçese…


… Prezident kiñäşçese…

Eş şunda ki, küptän tügel Rusiä teleradiokompaniäse qaramağına qaldırılğan “Tatarstan” däwlät teleradiokompaniäse pänceşämbe könne 13.30 Mäskäwdäge xällärgä qarata maxsus yañalıqlar çığarılışı yasadı. Anı älege kompaniä räise İrek Mortazin alıp bardı. Anıñ sorawlarına cawaplarnı prezident kiñäşçese Rafail Xäkimov birde. Başta ul Mäskäwdäge wäzğıätkä ğomumi kommentariy birde.

Tatarstan prezidentı kiñäşçese Mäskäwdäge xälne, qayber Rusiä säyäsätçeläre kebek Äl-Qayda belän bäyle bulğan dönyaküläm terror aktları belän ber rätkä quymıy. Bu -- çeçen xalqınıñ üzeneñ ayanıç xälenä tağın ber qabat Rusiä häm barlıq dönyanıñ iğtibarın cälep itü aksiäse, di ul. Mondıy aksiälär inde, mäğlüm bulğança, Budenovskiyda, Kizlärdä buldı. Şunısın äytergä kiräk, tapşıru barışında alıp baruçı da, säyäsi küzätüçe dä Çeçenya xälläre turıda söylägändä, “suğış,” “xalıq opolçeniese”, yäğni xalıq qarşılığı digän terminnar qullanğannar. Häm tapşıru barışında studiägä berençe çıltıratu da näq menä şuşı terminnarğa bäylänü buldı. Çeçnyada suğış tügel, ä antiterroristik operatsiä, çeçen opolçeniese tügel, ä banditlar, terrorçılar digän töşençelär qullanırğa täqdim itelde. Läkin tapşırunı alıp baruçılar monıñ belän kileşmädelär, çönki alar Çeçnyadağı xällärne kürep belgän, añlağan keşelär. İrek Mortazin, “Вести” korrespondenı bularaq, berniçä tapqır Çeçnyada komandirovkada bulğan, ä Rafail Xäkimov -- äle bıyıl yaz ğına İnguşetiädä. Tapşıru barışında Qazan xalqı ararsında Mäskäwdäge xälgä mönäsäbät turında soraşular süjetı da kürsätelde. Tatarstanda da Çeçnyağa qarata cämğıätneñ törle qarşılıqlı pozitsiälärgä bülenüen kürsätte. Qayberäwlär Çeçnyağa qarata tağın da köç qullanunı arttıru yağında, qayberäwlär xäzer uq suğışnı tuqtatu solıx söyläşülärenä kileşülärenä totınu yağında. Älbättä, tapşıruda Rafail Xäkimovnıñ Mäskäw xäleneñ ni belän betäsenä farazı da soraldı. Ul bolay dide:

Mäskäwdä totıqlar alğan terrorçılar dip atalğan bu keşelär axırğı çikkä citkerelgän keşelär. Alar inde üz teläklären belderü öçen üz maqsatlarına ireşü öçen ülergä dä äzer. Läkin ägär dä bu xällär ber genä totıqnıñ ber ğäyepsez keşeneñ ülem-citemenä kitersä, älege keşelärneñ bu ğämälläre keşelär aldında da, Alla aldında da aqlanmıy. Alar hiç tä şaxitlar bula almıylar.
XS
SM
MD
LG