Accessibility links

Кайнар хәбәр

Mintimer Şäymiev: Mäskäwdäge xällär Rusiäneñ ozaq tözälmi torğan yarası


Mintimer Şäymiev: Mäskäwdäge xällär Rusiäneñ ozaq tözälmi torğan yarası

Tatarstan Prezidentı Mintimer Şäymievneñ räsmi reaksiäse dä mäğlüm buldı. Pänceşämbedä Mäskäwdän Qazan aeroportına qaytıp töşkäç tä prezident press-konferensiä uzdırdı. Ul terrorçılarnıñ totqınnar aluın Rusiäneñ ozaq tözälmi torğan yarası dip atadı. Mintimer Şäymiev süzlärençä, çınllıqta bu yara çeçen problemasın köç qullanıp xäl itärgä mataşudan başlandı. «Mine şul sağayta, - dide prezident, - totqınnar aluçılar arasında yäş xatın-qızlar da bar. Ägär eş şuña barıp citkän inde, bu xällärne islam fanatizmı belän genä añlatırğa mataşu citärlek tügel.»

Moña östäp şunısın äytäse kilä. Soñğı waqıtta Rusiä xalqı Çeçnyada barğan suğışqa niçekter iäläşep kitte, aña iltifat itmi başladı. Yänäse, anıñ yädräse miña şäxsän itmi, qaydadır yıraqta oça. Moña Rusiäneñ mäğlümat çaraları da zur öleş kertte. Alar Çeçnyada banditlar tar-mar itelde, tormış caylana dip Kavkazdağı xällärne beryäqlı ğına yaqtırtıp, xalıqnıñ başın äyländerep kildelär. Baqsañ, Çeçnya xalqı isän häm xätta köräşä ikän äle. Ällä mançır öçen bädräflär citmägän, ällä suğış ikençe ber törle räweştä bara -- añlamassıñ.

Äye, ğadi keşelär Çeçnyadağı suğışnı üzläreneke dip tügel, xökümätneke genä dip qabul itte. Şuña kürä demokratlarnıñ suğışqa qarşı oyıştırılğan mitinglarında keşelär bik az buldı. Läkin suğış bit ul här waqıt ike yaq, ike köç arasında bara. Rusiä xalqı suğışta qatnaşqan Çeçnya yağınıñ ni öçen qan qoyuın añlamıy kilde. Yuqsa, suğışnı küptän tuqtatu ike yaq öçen dä barı tik faydağa ğına bulır ide. Yäşlär qırılmas ide, milliardlar xalıqnıñ üzenä qalır ide. Monı añlaw, suğışnı kiçektermi tuqtatu -- ul terrornı beterüneñ, bälkem, iñ ömetle yulıdır. Yäğni, näticä belän köräşü urınına säbäp belän köräşäse ide.

Häm soñğısı: Rusiä cirlegendä ğibrät alu digän närsä yuq. Moña xätle bulğan terror faktları bezne bernärsägä dä öyrätmäde.
XS
SM
MD
LG