Qazanda ike gumanitar fänni-ğamäli konferensiä açıldı

Xäbär itkänebezçä, sişämbe könne Qazanda Tatarstan xalıqları telläre turında qanun qabul itelügä 10 yıl tulu uñayınnan “Çağıştırma filologiä häm polilingvizm” dip atalğan fänni-ğamäli konferensiä açıldı. Konferensiädä qatnaşuçı ğalimnär, cämäğät eşlekleläre “Tatarstanda tellär turındağı qanunnı tormışqa aşıru mäsäläläre”, “Polietnik cämğıättä tel häm mädäniät” kebek qızıqlı çığışlar yasadılar. Konferensiädä qatnaşuçılar sişämbe könne ük Bötendönya tatar kongressınıñ Başqarma komitetında tügäräk östäl ütkärdelär. Şulay uq konferensiäneñ bülek utırışları da äle ike kön däwamında baraçaq. Ä plenar utırış 31 oktäberdä Qazan däwlät universitetınıñ tarix muzeenda ütäçäk, dielä räsmi xäbärdä. Şuña kürä älege konferensiä turında täfsileräk xäbärlär äle alda yasarbız. Sişämbe räsmi xäbärlärendä şulay uq Qazanda tağın ber bötenrusiä fänni-gämäli konferensiäse uzdırıldı, digän xäbär bar. Bu konferensiä Tatarstan prezidentı qarşındağı däwlät xezmäte institutında ütkän häm ul RFneñ grajdanlıq cämğıäte häm demokratik säyäsi sisteması buldırılu problemalarına bağışlanğan. Älege konferensiädä Qazan, Mäskäw, İjevskiy, Sember, Perm, Yekaterinburg ğalimnäre häm säyäsätçeläre qatnaşqan. Konferensiädä dokladlar belän Rusiä gumanitar universitetı professorı Äğdas Borhanov, Qazan däwlät universitetı politologiä kafedrası mödire professor Midxät Faruqşin häm Tatarstan Däwlät Şurası daimi komissiäse räise Vasiliy Loginov çığış yasadılar. Konferensiä materialları broşyuralar räweşendä näşer iteläçäk, dielä räsmi xäbärdä.