Accessibility links

чәршәмбе, 7 декабрь 2016, Казан вакыты 23:31

Vladimir Putin milli säyäsätkä iğtibarnı arttırunı taläp itä


Vladimir Putin milli säyäsätkä iğtibarnı arttırunı taläp itä

Rusiä prezidentı Vladimir Putinnıñ avgust axırında Qazanğa kilep milli zıyalılarıbız belän oçraşuı ezsez qalmadı dip äytergä bula. Mäskäw matbuğatı bu xaqta beryäqlıraq qına yazsa da, şunısı mäğlüm buldı. Rusiä prezidentı Bötendönya tatar kongressınıñ III qorıltayınnan soñ federal' xökümätkä «qimmätle» kürsätmälären birgän.Berençedän, Rusiäneñ milli säyäsät konsepsiäsenä waqıt uzu häm üzgäreşlär bulu säbäple tözätmälär, östämälär kertelergä tieş. İkençese: gomumrusiä «Культура» telekanalında Rusiä xalıqları turında daimi programmalar buldırılırğa tieş. Tağın ber kürsätmä: Mäskäwdä Tatar milli-mädäniäte üzäge açu turında. Monısın prezident apparatı Mäskäw xökümäte belän berlektä 2003 yılnıñ 1 ğıynvarenä xätle başqarırğa tieş.Putinnıñ tağın ber boyırığı mäğärif ministrlığına qağıla: urta ğomum belem alu sistemasında Rusiä xalıqlarınıñ tellären häm mädäniätlären öyränüne ğamälgä quyarğa. Älbättä, monısı uquçılarnıñ ixtiärlarına bäyle bulaçaq. Şulay itep, iñ yuğarı däräcädä milllätlärgä iğtibarnı arttıru turında äytelde.Rusiä xökümäte berençe adımnarın ozaq köttermäde. 29-30 oktäberdä Perm şähärendä törle millät wäkillären cıyıp, Bötenrusiä fänni-ğamäli konferensiäsen uzdırdı. Ul «XX-XXI ğasırda däwlätneñ milli säyäsäte: töbäqära aspekt» dip atalğan ide. Älege märtäbäle çarada Perm ölkäse gubernatorı Yuri Trutnev, Rusiäneñ millätlär ministrı Vladimir Zorin, Dumanıñ millätlär eşe buyınça komitet räise Valentin Nikitin häm başqalar qatnaştı. Tatarstannan kilgän Bötendönya tatar kongressı räise urınbasarı İlsur Џadiullin häm Xalıqlar yortı direktorı Säğit Djaksıbaev konferensiädä häm anıñ «tügäräk öställärendä» çığışlar yasadı.Äytergä kiräk, konferensiädäge söyläşü dä, anda qabul itelgän täqdimnär dä iğtibarğa layıq. Milli säyäsätneñ küp yıllar deklaratsiä räweşendä genä bulıp, millätlär yazmışına tä'sir itmäwe alardan yıraq toruı, soñğı waqıtta här kemgä dä açıq kürenä başladı. Nihayät aña xökümät tä iğtibar itärgä mäcbür. Birsen xoday. Läkin ber qarlığaç qına yaz kitermi digändäy, berençe adımnar äle ul problemanı tulayım xäl itü tügel. Monda inde yäşärbez-kürerbez diärgä qala. Häm Mäskäw byurokratiäsenä härdaim basıp torırğa kiräk ikänen dä onıtmasaq döres bulır ide.
XS
SM
MD
LG