Räfqät Altınbaev Qazanda jurnalistlar belän oçraştı

Şimbä könne Federatsiä Sovetında Tatarstan prezidentı wäkile bulıp eşläwçe Räfqät Altınbaev “Säfär” qunaqxanäsendä jurnalistlar belän oçraştı. Ul üze äzerlägän qanun proektı buyınça cirle üzidärä sisteması reforması turında söyläde. Räsmi häm möstäqil gäzit, radio, televidenie, İnternet mäğlümät çaralarınnan kilgän jurnalistlar Räfqät Altınbaevnıñ “Jizn'” dip atalğan firkäneñ räistäşe buluına da iğtibar ittelär. Cirle üzidärä turında söylägän Räfqät Altınbaev däwlät milkennän tış başqa munitsipal' milekneñ dä bulırğa tieşlegen rasladı. Ul Tatarstan Däwlät Şurası häm xökümäte belän Qazan şähäre administratsiäse arasında barğan küptänge bäxästä şähär xaqimiäte yağın yaqlasa da, üzen neytral' senator itep kürsätergä tırıştı. Räfqät Altınbaev üzeneñ çığışında Vladimir Putin isemen häm prezident belän bergä üzidärä qanunı proektı tikşerüen, Rusiä Däwlät Dumasında şuşı mäsäläneñ qaraluın tarixi waqiğa, dip atadı.