Accessibility links

чәршәмбе, 7 декабрь 2016, Казан вакыты 13:38

Tatarstan Konstitutsiäsenä 10 yıl


Tatarstan Konstitutsiäsenä 10 yıl

4 köngä suzılası bäyräm yal könnäre aldınnan tabiğät tormış çınbarlığı qırıslığın tağın ber tanıtqanday itte. Tatarstanğa kinät kenä suıq-burannar kilde. Ber-ike köndä respublikada aylıq norma diärlek yawım-töşem, yüeş qar yawdı. Ğädättäntış xällär ministrlığı Çistay, Quqmara, Teläçe rayonnarında 53 awılda elektr energiäse özelde. Şähär yanı häm Layış urman xucalıqlarında ağaçlar awdı, bäxetkä, qorbannar bulmadı, dip xäbär itte.

Monnan 10 yıl elek, 1992 yılnıñ 6 noyäberendä respublika dürtençe Konstitutsiäsen qabul itte. Küptän tügel Tatarstan Konstitutsiäseneñ 10 yıl uñayınnan “Tatarstan yaña ğasır” ictimaği xäräkäte press-klub ütkärde. Anda prezident kiñäşçese Rafail Xäkimov, Däwlät Şurası deputatı Marat Galiev jurnalistlar sorawlarına cawap birde. Säyäsätçelär 1992 yılda qabul itelgän Konstitutsiäseneñ qimmätlelegen häm unikallelegen tarixta raslanuın bilgeläp ütte. Konstitutsiä möstäqillek töşençäsen açıq bilgeläde, ike däwlät teleneñ dä tigez xoquqlılıq prinsipları bilgelände. Şulay uq anda xalıqara häm tışqı iqtisadi elemtälär urnaştıru da täwge märtäbä çağılış taptı. Tatarstan säyäsätçeläre şulay uq soñğı waqıtta Tatarstan qanunnarına basım yasaw, alarnı Rusiä qanunnarına yaraqlaştıru protsessına da bäya birdelär.

Bıyıl april ayında qabul itelgän häm 10 mayda ğämälgä kertelgän Tatarstan Konstitutsiäseneñ yaña redaksiäse gömümfederal' qanunnarı taläplärenä turı kilä, dip sanıy alar. Şulay itep, monnan un yıl elek qabul itelgän häm yartı yıl elek yañartılğan Konstitutsiä respublikada sotsial'-iqtisadi totrıqlılıq, millätara tatulıq garantiäse buldı. Tatar tele däwlät tele däräcäsenä quyılsa da, aña başqa tellärdän östenlek birelmäde.
XS
SM
MD
LG