Tatarstanda 6 noyäber, çärşämbe — yal köne. Respublika üzeneñ Konstitutsiä könen bäyräm itä. Monnan 10 yıl elek 1992 yılnıñ 6 noyäberendä Tatarstan Yuğarı Şurası respublikanıñ yaña Konstitutsiäsen qabul itte. Näq menä şuşı Konstitutsiädä Tatarstan Däwlät suverenitetı turındağı Deklaratsiädäge töp ideyälär häm prinsiplar xoquqıy yaqtan berketelde. Xäyer, annan birle inde şaqtıy waqıt ta uzdı, respublikanıñ töp qanunına küp kenä üzgäreşlär dä kertelde. Şunlıqtanmı, bu şaqtıy ğına zur yubiley buluğa da qaramastan, Tatarstanda ällä ni zur bäyräm çaraları ütmäde. Alay da respublikada tatar telendä dönya kürgän gäcitlärneñ çärşämbe sannarı bäyrämçä bizälgän ide. Ä menä urıs telle gäcitlär kübräk başqa temalarğa yazdılar. Alarda bäyräm ruxı küzätelmäde. Tatarstan Konstitutsiäse köne uñayınnan respublika prezidentı Mintimer Şäymievneñ möräcäğäte dä dönya kürde. Respublikanıñ konstitutsion nigezlären nığıtu, xoquqıy cämğıät tözü häm federalizmnı üsterü buyınça 10 yıllıq yulnı bez layıqlı uzdıq. Şuşı waqıt eçendä respublika häm anıñ xalqınıñ abruyı çağıştırğısız üste. Bezneñ ğorurlanırlıq närsälärebez, yaqtı perspektivalarıbız bar, dip äytelä Mintimer Şäymievneñ Tatarstan Konstitutsiäse köne uñayınnan çıqqan möräcäğätendä. Bäyräm belän respublika xalqın häm anıñ citäkçelegen şulay uq Rusiäneñ Yevropa berläşmälärendäge daimi wäkile Vasiliy Lixaçev ta qotladı.
6 noyäber — Tatarstan Konstitutsiäse köne
6 noyäber — Tatarstan Konstitutsiäse köne