Accessibility links

сишәмбе, 6 декабрь 2016, Казан вакыты 08:52

Leninnıñ kem ikänen belmi torğan yaña buın üsep kilä


Leninnıñ kem ikänen belmi torğan yaña buın üsep kilä

7 noyäberdä uzğan Tatulaşu könendä dä üzara añlaşuğa adım yasaldı dip äytep bulmıy. İnde xäbär itkänebezçä, Qazanda Oktäber inqilabına bağışlanğan mitingta kommunistlar reformalar häm alarnı alıp barğan xaqimiätkä qarşı kisken fikerlär äyttelär. Här yılnı 7 noyäberdä uza torğan älege cıyın köz ayınıñ sarı yafraqları kebek tabiğatneñ ayırılğısız ber bilgesenä äwerelde. Läkin waqıt üzeneken ala. İnde Lenin babaynıñ kem ikänen belmi torğan yaña buın üsep kilä. Bolay da säyäsätkä bitaraf yäşlär iske tormış turında ölkännärdän genä işetep belälär. «Восточный экспресс» gazetasınıñ soñğı sanında ber qızıqlı diagramma birelgän. Annan kürengänçä, qazanlılarnıñ 14% närsä ul sotsializm dip sorağannar. “Sotsializmnı sağınasızmı?” digän sorawğa 29% «yuq» dip cawap birgän. Şul uq waqıtta qazanlılarnıñ 57% sotsializmnı sağınıp iskä alalar. Alar arasında küpçelek urta häm ölkän buın wäkilläre. Kommunistlar mitingları, şiğarläre belän näq şul qatlamnıñ xäteren quzğatırğa telilärder dä. Xäyer, xaqimiätneñ reformaların annan-monnan alıp baruı da qänäğätsezlär sanın arttıra. Alar xakimiätne sükkän här firqağä, säyäsi xäräkätkä kilep quşılırğa mömkin.

Bäyräm ığı-zığısı belän Qazanda şuşı könnärdä uzğan ber press-konferensiä iğtibar üzägennän töşep qaldı, bulsa kiräk. Qayber gazetalar anıñ turında berniçä süz belän genä äytep kittelär kitüen. Rusiä Federal' şurasında utıruçı Tatarstan prezidentı wäkile Räfğat Altıynbaev uzdırğan press-konferensiädä süz cirle üzidaräne reformalaw turında bardı. Senator Altıynbaev, älege qanunnı tudıruçılarnıñ berse bularaq, aña zur ömetlär bağlıy, anı tizräk ğämälgä aşırırğa kiräk dip isäpli. İsegezgä töşerep ütim: älege qanunda şähär häm rayonnarda xaqimiätne bülü qaralğan. Yäğni, wäqälätle orğannarnı (xäzerge şähär häm rayon sovetların) ber keşe, ä başqarma orğannarnı ikençe keşe citäkläiäçäk. Ä xäzergä bezdä yış qına ber keşe ike urındıqta utıra.

Journalistlar belän oçraşu waqıtında Räfğat Altıynbaev Mintimer Şäymiev belän altı ay oçraşmawı xaqında söyläde. Läkin prezident apparatı belän aralaşıp torğanğa bu senatornıñ eşenä qomaçawlamağan ikän.
XS
SM
MD
LG