Accessibility links

якшәмбе, 4 декабрь 2016, Казан вакыты 09:10

Televidenie citäkçese eşennän kitäme?


Televidenie citäkçese eşennän kitäme?

Menä ike atna inde Tatarstannı, şul isemdäge teleradiokompaniä räise İrek Mortazinnı, prezident kiñäşçese Rafael Xäkimovnı Mäskäwdä totqınnar alınğan waqıtta Çeçnyada suğış tuqtatu temasın quyırtqan öçen tänqitlilär. Xättä Rusiä prezidentına şikäyätlär, terrorçılarnı yaqlawda ğayeplägän donoslar da cibärelä. 11 noyäbrdäge “Вечерняя Казань” gazetasında bu turıda bolay yazılğan. “Kilep tuğan wäzğiättä Mintimer Şäymiev nişlärgä tieş? Ägär dä ul Mortazinnı eşennän alıp taşlasa, bu süz iregen, demokratiäne qısu bulıp kürenäçäk. Ägär dä qaldırsa, Tatarstan citäkçelegen Çeçnya separatizmında ğäyeplärgä mömkinnär. Älegä Şäymievneñ nindi dä bulsa kisken xäräkäte küzgä taşlanmadı. Ul İnterfaks agentlığına, ğädättän tış xällärdä jurnalistlar etikasınıñ berdäm qağidäläre bulırğa tieş, dip intervyu birgän. Ägär dä däwlät teläsä nindi wäzğiätkä tıqşınsa, jurnalistlar tarafınnan andıy ğämällär tulı külämdä qabul itelmiäçäk. Tatarstan prezidentı fikerençä, jurnalistlar berläşep kodeks yä xartiä qabul itä ala. Mäskäwdäge qatlawlı wäzğiät waqıtında Rusiä Eçke eşläre ministrı urınbasarı Vladimir Vasil'yev üzen iñ yaxşı yaqtan kürsätte, dip äytkän Şäymiev. Añlağan keşegä barıp citärlek. Vasil'yevnıñ krizis xälläre turındağı mäğlümätlären Şäymiev xuplıy. Läkin başqa jurnalistlarnıñ, şul isäptän “Tatarstan” teleradiokompaniäseneñ eşçänlegenä ul bäyä birmi. Jurnalistlar üzläre kodeks yäki xartiä yazıp, üzlären üzläre tıysınnar, dip sanıy ul. Şul uq arada Vladimir Putin häm başqa bilgele säyäsätçelär Çeçnya suğışın tuqtatu çarasın kürergä kiräk, digän belderülär yasadı. Dimäk, Mäskäwdäge xälne Tatartsan kiterep çığarmağaç, monıñ öçen Qazandağı keşelärne ğäyepläw döres tügellege añlaşılıp tora.
XS
SM
MD
LG