Çallıdağı äbilär häm pravoslav ziratınnan yuğalğan 13 täre turında

Respublikağa qarşı alıp barılğan mäğlümät höcümendä Tatarstan jurnalistlarınıñ da öleşe bar. Rusiä cämäğätçelege Tatarstan militsionerlarınıñ Çeçnyağa barıp, alnı-yalnı belmiçä tärtip saqlawların, Gudermesta, Şelkovskoyda xezmät itüläre turında belmi, belsädä – ise kitmi. Soñğı atnalar häm aylar buyı qayber İnternet agentlıqları häm gäzitlär, telekompaniälär Çallıdağı çirkäw, Räfis Kaşapovnıñ çirattağı macaraları turında törle xäbärlärne küpertep, bertuqtawsız yañğıratıp tordı. Milli xäräkätneñ barı tik Çallıda ğına tügellegen, anda Räfis Kaşapovtan başqa milli liderlar barlığın, milli xoquq, mädäniät, mäğärif yulında xäräkät itüçe zıyalılarnıñ ğämällären kürsätü, añlatu bötenläy bulmadı diärlek. İntertat.ru gazetası Çallı ziratında 13 täre yuqqa çığu turında xäbär birep, çirattağı söençene aldı. Küçtänäçen kemnär kemgä birer, anısı mäğlüm tügel. Şunısı xaq, obyektiv mäğlümät birergä teläwçelärgä, ayırım alğanda ”Azatlıq” radiosına, eşlär bik küp bu könnärdä.