…häm latin imlasına mönäsäbäten belderde

Ä inde Rusiä Däwlät Dumasınıñ Rusiädä kirillitsadan başqa imlanı tıya torğan qanun qabul itüenä qarata Mintimer Şäymievneñ fikeren uzğan xäbärebezdä citkergän idek. Sişämbe könne dönya kürgän köndälek mäğlümat çaralarında Mintimer Şäymievneñ älege mäsälägä qarata birgän intervyusı tulısınça birelä. Mäğlüm ki, Mintimer Şäymiev Rusiädä kirillitsadan başqa imlalarnı tıyunı xoquqi yaqtan qarağanda, kimçelekle dip atadı. Çönki ul 1991 yılda Rusiä Yuğarı Şurası qabul itkän Rusiä xalıqları telläre digän Deklaratsiägä qarşı kilä, şulay uq Rusiä Däwlät Duması qanunı töbäk telläre turında häm milli azçılıq turındağı 1992 yılğı Yevropa xartiäsenä dä turı kilmi. Şulay da, älege äñgämäseneñ azağında Mintimer Şäymiev Rusiä Federatsiä xalıqlarnıñ başqa yazuğa küçüen tıyuçı qanunnıñ buluı yäki bulmawı bezneñ öçen tatar yazuın latin grafikasına küçerü protsessın bilgeli almıy, eş bötenläy başqa närsädä, dip añlatıp tämamlıy. Häm tağın ber qabat tatar yazuın latin imalsına küçerü çittä yäşäwçe tatarlarnıñ milli ädäbiättän, ruxi dönyasınnan häm mädäniätennän yıraqlaşuğa kiterergä mömkin digän fikeren qabatladı. Şulay itep, ul latin imlasına küçüdä aşıqmasqa, eksperimentnı däwam itterergä digän pozitsiäsen tağın ber rasladı. Tatarstannıñ säyäsi citäkçelege Rusiä Däwlät Duması älege qanunnı qabul itkäç tä soñ tügel, dip sanıy. Qanunnı Federatsiä Şurası tikşerep raslağançı, häm Rusiä prezidentı imza salğançı tieşle kiñäşmälär häm xoquqi ekspertiza ütkärep ölgerergä niätli. Tatarstan Däwlät Şurasınıñ fän, mäğärif, milli mäsälälär komissiäse da älege mäsäläne sessiä kön tärtibenä kertergä cıyınuın belderde. Annarı soñ qabul itelgän qarar Rusiä Konstitutsion mäxkämäsenä tapşırılaçaq.