Accessibility links

шимбә, 3 декабрь 2016, Казан вакыты 12:47

Tatarstanda terroristlarnı yaqlıylarmı?


Tatarstanda terroristlarnı yaqlıylarmı?

Tatarstan teleradiokompaniäse räise İrek Mortazin teatr üzägen basıp alğan terrorçılarnı yaqlawda ğäyeplänep, “Vesti nedeli” tapşıruında böten Rusiägä faş itelgäç, bu jurnalsitnı yaqlawçılar xäzer berqayda da kürenmi. Mäskäw televidenie ekranınnan Tatarstan prokurorı İrek Mortazin oyıştırğan tapşıru buyınça cinayät eşe quzğatılu turında äytkän ide. Bu eş niçek kenä tämamlansa da, İrek Mortazinnıñ bar ğäyebe mäsälägä ber yaqtan tügel, ä Rusiä yağınnan da, çeçennar yağınnan da qararğa tırışuı.

Älege anıñ tapşıruındağı çığışlar terroristlarnı xuplaw tä'siren qaldırdımı, yuqmı? Monıñ öçen televidenie programmasın prokuraturada maxsus ekspertlar qararğa tieş. Ä bit şul uq tapşıruda terrorçılar häm şähitlärneñ ocmaxqa eläkmiäçäge, älege waqiğanıñ faciğä buluı turında da belderelgän ide. Kem belä, İrek Mortazin tapşıruına qarata säyäsi bäya birelgännän soñ, xoquqıy bäya nindi bulır? Ul çınnan da nindi qanunnıñ nindi matdäsen bozğan soñ? Şunıñ östäwenä, İrek Mortazinnıñ şäxsi mänfäğätlärdän çığıp nindi dä bulsa ğämällär qıluı mäğlüm tügel. Ul säyäsi häm ideologik bäxäs waqıtında saqsızlıq kürsätüe arqasında awır xälgä töşte.

Kemneñ qulında balta, şul anı üze telägänçä qullana. Şul uq “Moskovskiy komsomolets” gazetasınıñ Başqortostan çığarılışında 20 noyäberdä tağın ber konflikt turında yazğannar. Tıñlawçılarıbız radionıñ Qazan bürosına faks aşa älege mäqäläne cibärdelär. Başqortostanda milli mäsälälär buyınça şiqäyätlär yış qına yañğırap torsa da, federal' üzäk mondıy waq-töyäkka ällä ni iğtibar itmi. Ä menä Başqortostan Yuğarı sudınıñ räise Marat Wäkilov üzenä fatir alğanda, mebel' qaytarıp cıyğanda bik zur summalarğa fayda kürep, üz mänfäğätlären östen quysa da, üzäk anı qayğırtıp, yaqlap tora. Xättä Rusiä yuğarı mäxqämäseneñ räise Lebedev Wäkilovnı yaqlap respublikanıñ Yuğarı sudı citäkçelegendä saqlıy. Rusiä Yuğarı mäxqämäse, prokuraturası, milli respublikalarnıñ konstitutsiälären, xoquqların turaqlaw öçen köçlären qızğanmıylar, çamadan tış prinsipial' bulırğa tırışalar. Ä inde qayber çinovniklar, sud'yalar üzläre namussızlıq yulına basalar ikän, läkin östägelärneñ kürsätmälären ütilär ikän — alar barıber ğäyepsez bulıp çığa. Süz irege qısalarında ike törle fikerne yañğıratqan İrek Mortazin eşennän alınsa, Başqortostanda üze telägänçä balda-mayda yözgän Marat Wäkilov üzäkneñ yaqlawı yärdämendä haman üz eşen däwam itterä. Qayber mäğlümätlärgä qarağanda, pänceşämbe könne Marat äfände Wäkilov sud'yalar konferensiäsen ütkärergä cıyına ikän. Läkin belgeçlär süzlärençä, bu cıyılış legitim bula almıy. Çönki anı oyıştıruda da qayber tögälsezleklär barlığı açıqlanğan. Xäyer, xäzerge çorda Tatarstanda da, Başqortostanda da säyäsät, xoquq belän bäyle, bolğançıq problemalarnıñ öçı-qırıyı yuq. Läkin milli zıyalılar fikerençä, säyäsät häm däwlät mayatnigınıñ millät häm respublika yaqlılarnı ber çitkä kiterep qısqan waqıtı irtäme-soñmı ütep kitärgä tieş.
XS
SM
MD
LG