Accessibility links

пәнҗешәмбе, 8 декабрь 2016, Казан вакыты 15:07

Mintimer Şäymievneñ Mäskäw säfäre iğtibar uzägendä


Mintimer Şäymievneñ Mäskäw säfäre iğtibar uzägendä

Tatarstanda bu arada waqiğalar küp häm alar küz iärmäslek tizlek belän uza. Säyäsätçelär, mäsälän, zur iğtibar belän respublika citäkçese Mintimer Şäymievnıñ Mäskäwdäge säyäxäten küzätte. Rusiä mäğlümät çaralarınıñ soñğı waqıtta Tatarstanğa häm anıñ citäkçelärenä qarşı açqan tänqit utı Rusiä başqalasındağı söyläşülärgä tä'sir itkänme-yuqmı? Äytergä kiräk, Mintimer Şäymiev Mäskäwgä kiter aldınnan da, başqalada bulğanda da töp mäsälälär buyınça üz fikeren açıq belderde. Däwlät Dumasınıñ latinğa qarşı qanun qabul iteüenä, respublikanı ekstremizm oçraqlarına bitaraf toruda ğäyepläwlärgä häm başqa şundıy nizağlı temalarğa Tatarstan citäkçelege qaraşı berençe keşe tarafınnan bäyän itelde. Häm bu berküpme kierenkelekne yomşarttı kebek. Härxäldä, Tatarstan prezidentınıñ «Единство» firqäseneñ räistäşe bulıp qala birüe aña Mäskäw Kremeleneñ ışanıçı barlığı xaqında söyli.

Tatar-inform xäbärlärenä qarağanda, 21 noyäberdä Mintimer Şäymiev «Россия» telekanalınıñ «Вести недели» programmasına intervyu birgän häm ul yäkşämbedä, yäğni 24 noyäberdä kiçke 8 dä şul kanaldan kürsäteläçäk. İsegezgä töşerim, uzğan yäkşämbedä näq şul kanal Tatarstandağı millätçelek, ekstremizm oçraqları xaqında küpertep süjet kürsätkän ide. Älbättä, Mäskäwdä momenttan faydalanıp qayber töbäk citäkçelären urınğa utırtu teläge zurdır. Monısı sizemlänep tora.

Läkin haman da ber balıq başın çäynäp toru da uñay näticälär birmi. 21 noyäberdä Mintimer Şäymiev Rusiä Federatsiäse Däwlät Sovetı prezidiumı utırışında qatnaştı. Monda da bik möhim mäsälä buyınça söyläşülär barğan. Älegä bu xaqta täfsilläberäk äytep bulmıy, çönki räsmi xäbärlär bik saran yañğıradı. Läkin şunısı bilgele: «Rusiä Federatsiäse däwlät xaqimiäteneñ zakonnar çığaru häm başqa orğannarın ğomumi oyıştıru prinsipları» turındağı qanun turında süz barğanda, Tatarstan prezidentı çığış yasap, üzeneñ pozitsiäsen äytkän. Anıñ fikerençä, bu qanunnıñ qayber maddäläre äle haman da federatsiä subyektlarınıñ wäqälättlären çiklilär, xättä Rusiäneñ üz Konstitutsiäsenä qarşı kilälär.

Bu temanı däwam itep, tağın şunısın da östik. Uzğan atnada Rusiä Yuğarı mäxkämäse Tatarstan Yuğarı sudınıñ qararın kire bordı. Süz älege dä bayağı general' prokuror urınbasarı Aleksandr Zvyaginsevnıñ protestı turında bara. Mäğlüm ki, Tatarstan Yuğarı sudı bu tınğısız prokurornıñ Tatarstan Konstitutsiäseneñ qayber maddäläreneñ federal' Konstitutsiägä qarşı kilä digän ğarizasın qanäğätländermägän ide. Näticädä Mäskäwdän Qazanğa Zvyaginsevnıñ protestın yañabaştan qararğa digän färman iñderelde. Häm şuña kürä Tatarstan Däwlät Sovetı östendäge qara bolıtlar taraldı dip äytergä irtäräk äle.
XS
SM
MD
LG